Oʻzbekiston Respublikasi Transport vaziri Ilxom Maxkamov hamda Korea Aerospace University (KAU) prezidenti Xi Yon Xurr boshchiligidagi delegatsiya oʻrtasida muzokaralar boʻlib oʻtdi.

Uchrashuv davomida 2023-yilda Oʻzbekiston Respublikasi Prezidenti Shavkat Mirziyoyev tashabbusi bilan Toshkent davlat transport universiteti hamda KAU oʻrtasida tashkil etilgan uchuvchilarni tayyorlash boʻyicha 1+2+1 qoʻshma taʼlim dasturining istiqbollari, shuningdek aviatsiya sohasida boshqa yoʻnalishlarda mutaxassislar tayyorlash boʻyicha hamkorlikni yanada rivojlantirish masalalari muhokama qilindi.

Maʼlumot uchun, Korea Aerospace University Janubiy Koreyaning yetakchi ixtisoslashtirilgan oliy taʼlim muassasalaridan biri hisoblanib, mamlakatning aerokosmik sohada global yetakchiga aylanishida muhim oʻrin tutadi. Universitet ilmiy-tadqiqot faoliyatida yuqori natijalarga erishgan boʻlib, oʻzining parvozlarni tayyorlash markazi hamda sunʼiy yoʻldoshlarni boshqarish markazi kabi zamonaviy infratuzilmaga ega. Shuningdek, u Boeing, Airbus va NASA kabi xalqaro tashkilotlar bilan yaqin hamkorlikni yoʻlga qoʻygan.

Muzokaralar chogʻida KAU prezidenti tomonidan 2027-yilda Koreyada taʼlim olayotgan oʻzbekistonlik uchuvchi-talabalarning yurtimizga qaytishi, ular uchun zarur infratuzilmani shakllantirish, shuningdek oʻquv mashgʻulot havo kemalari va trenajyorlar bilan taʼminlash masalalari yuzasidan taklif va mulohazalar bildirildi.

Shu bilan birga, KAU tomoni Oʻzbekistonda tashkil etilishi rejalashtirilayotgan uchuvchilarni tayyorlash parvoz maktabiga oʻquv-metodik materiallar, darsliklar va zamonaviy dasturiy taʼminotni taqdim etishga tayyor ekanini, shuningdek uchuvchi-talabalarni malakali instruktorlar bilan taʼminlash imkoniyatlari mavjudligini maʼlum qildi. Shuningdek, Oʻzbekiston tomonidan KAUga yuboriladigan kursantlarni kelgusida instruktor sifatida tayyorlab, yurtimizga qaytarish tashabbusi ilgari surildi. Taʼkidlanganidek, mazkur yondashuv uchuvchi kadrlar tayyorlash xarajatlarini qisqartirishga xizmat qiladi.

Qayd etish lozimki, 2023-yildan buyon Oʻzbekistonda uchuvchilarni “boshlangʻich tayyorlash” boʻyicha keng koʻlamli ishlar amalga oshirilib, bugungi kunda bir-biridan mustaqil 5 ta oʻquv dasturi yoʻlga qoʻyilgan. Natijada 4 562 nafar talaba ushbu yoʻnalishda tahsil olmoqda, ularning bir qismi xalqaro hamkorlik dasturlari doirasida xorijiy davlatlarda, jumladan Koreya va Sloveniyada taʼlim olmoqda.

Uchuvchilarni boshlangʻich tayyorlash jarayoni xalqaro fuqaro aviatsiyasi talablariga muvofiq amalga oshirilib, nazariy bilimlar bilan bir qatorda kichik oʻquv havo kemalarida amaliy parvozlarni ham oʻz ichiga oladi. Ushbu bosqichda Xususiy uchuvchi litsenziyasini (PPL) olish asosiy ahamiyatga ega hisoblanadi. Keyingi bosqichlarda esa uchuvchilarni qayta tayyorlash va yangi turdagi havo kemalariga moslashtirish ishlari amalga oshiriladi.

Shu oʻrinda, Uzbekistan Airways Training Center uchuvchilarni qayta tayyorlash va malakasini oshirish sohasida zamonaviy infratuzilmaga ega ekanini taʼkidlash joiz. Markaz yuqori aniqlikdagi professional trenajyorlar bilan jihozlangan boʻlib, xalqaro standartlar asosida faoliyat yuritmoqda. Boshlangʻich tayyorgarlik bosqichida esa Sloveniyaning “Egmont Aviation” akademiyasi bilan hamkorlik yoʻlga qoʻyilgan.

Mazkur hamkorlik Oʻzbekistonda aviatsiya taʼlimi sifatini xalqaro standartlar asosida yanada oshirish, zamonaviy infratuzilmani rivojlantirish va yuqori malakali, raqobatbardosh uchuvchi kadrlar tayyorlashda muhim ahamiyat kasb etadi.