Andijonda 30 sotix yer savdosi ortidan mahalla raisi va hokim yordamchisi ushlandi. Bu haqda Davlat xavfsizlik xizmati xabar berdi.

Aniqlanishicha, Andijon tumanidagi MFYlardan birining raisi va ushbu mahalladagi hokim yordamchisi oʻzaro til biriktirib, 1967-yilda tugʻilgan fuqaroga chorvachilik maqsadida mazkur mahalla hududidan ajratib berilgan yer maydonining 2 sotixini hamda davlat zaxirasida boʻlgan 28 sotix yerni Andijon shahrida yashovchi, 1989-yilda tugʻilgan shaxs nomiga rasmiylashtirib berishni reja qiladi.

Ular jami 30 sotix yer maydonining bir qismini noturar, qolgan qismini turar joy toifasiga oʻzgartirib berishni aytib, yer uchun 57 ming dollar va kadastr idoralaridagi tanishlari orqali hujjatlarni rasmiylashtirish uchun 3 ming dollar talab qiladi.

Davlat xavfsizlik xizmati va Iqtisodiy jinoyatlarga qarshi kurashish departamenti xodimlari hamkorligida oʻtkazilgan tezkor tadbirda mahalla raisi va hokim yordamchisi oldindan yer maydoni uchun 28 ming dollar hamda kadastr hujjatlarini rasmiylashtirish uchun 3 ming dollar olgan vaqtida ashyoviy dalillar bilan ushlangan.

Qayd etilishicha, hozirda ularga nisbatan jinoyat ishi qoʻzgʻatilib, tergov harakatlari olib borilmoqda.