Joriy yilning 28-aprel kuni Senat Raisining birinchi oʻrinbosari Sodiq Safoyev Buyuk Britaniya Parlamentidagi Markaziy Osiyo mamlakatlari boʻyicha umumpartiyaviy parlament guruhi raisi Pamela Koks boshchiligidagi delegatsiya bilan onlayn shaklda uchrashuv oʻtkazdi.

Uchrashuv davomida Oʻzbekiston va Buyuk Britaniya oʻrtasidagi ikki tomonlama munosabatlarning bugungi holati va istiqbollari atroflicha muhokama qilindi. Xususan, parlamentlararo muloqotni izchil rivojlantirish, savdo-iqtisodiy va investitsiyaviy hamkorlikni kengaytirish, shuningdek, taʼlim, ilm-fan hamda madaniy-gumanitar sohalardagi aloqalarni yanada mustahkamlash masalalariga alohida eʼtibor qaratildi.

Tomonlar taʼkidlaganidek, soʻnggi yillarda Oʻzbekiston va Buyuk Britaniya oʻrtasidagi siyosiy muloqot barqaror va izchil rivojlanib, oʻzaro hamkorlik sifat jihatidan yangi bosqichga koʻtarilmoqda. 2024-yil aprel oyida imzolangan Keng qamrovli sheriklik toʻgʻrisidagi deklaratsiya, shuningdek, tashqi siyosat idoralari va hukumatlar darajasidagi faol aloqalar ikki tomonlama munosabatlarga tizimli va uzoq muddatli xarakter bagʻishlamoqda.

Suhbat chogʻida iqtisodiy hamkorlikni chuqurlashtirish istiqbollari ham muhokama qilindi. Jumladan, “yashil” iqtisodiyot, muhim minerallar, raqamli texnologiyalar, moliyaviy xizmatlar va qishloq xoʻjaligi kabi ustuvor yoʻnalishlarda amaliy hamkorlikni kengaytirish masalalari koʻrib chiqildi.

Uchrashuv yakunida tomonlar parlamentlararo muloqotni faollashtirish ikki mamlakat oʻrtasidagi strategik sheriklikni yanada mustahkamlash va uni yangi bosqichga olib chiqishga xizmat qilishini alohida taʼkidladilar.