AQSH prezidenti Donald Tramp ishtirok etayotgan tadbirda otishma sodir boʻldi. Bu haqda BBC xabar berdi.

Hodisa Vashington shahridagi Vashington Hilton mehmonxonasida oʻtkazilgan Oq uy muxbirlarining anʼanaviy kechki yigʻini vaqtida yuz bergan. Tadbirda Donald Tramp prezident sifatida ilk bor qatnashgan edi. Shuningdek, kechada birinchi xonim Melaniya Tramp, vitse-prezident Jey Di Vens, yuzlab jurnalistlar, ommaviy axborot vositalari vakillari hamda davlat amaldorlari ishtirok etgan.

Dastlabki maʼlumotlarga koʻra, gumonlanuvchi shaxs mehmonxona foyesiga kirib, xavfsizlik postlari va metall detektor moslamalaridan oʻtishga uringan. Hodisa taxminan Grinvich vaqti bilan 00:45 da sodir boʻlgan. Shu paytda bir necha kuchli portlashsimon ovozlar eshitilgan, shisha singani va odamlarning zalga qochib kirgani kuzatilgan.

Koʻpchilik mehmonlar stollar ostiga yashiringan, zalda vahima yuzaga kelgan. Xavfsizlik xodimlari esa darhol Donald Tramp va boshqa rasmiylarni binodan olib chiqqan. Hujumni toʻxtatish vaqtida bir politsiya xodimi yaqin masofadan otilgan oʻqqa nishon boʻlgan, ammo oʻq oʻtkazmaydigan jilet uning hayotini saqlab qolgan.

Hujumda gumonlanayotgan shaxs 31 yoshli Koul Tomas Allen ekani xabar qilinmoqda. U 27-aprel, dushanba kuni zoʻravonlik jinoyati vaqtida oʻqotar qurol ishlatish kabi bir nechta moddalar boʻyicha ayblanishi kutilmoqda. Tramp hodisadan keyin jurnalistlarga soʻnggi uch yildagi bir necha suiqasd urinishlarini eslab, “Bundan xavfli kasblar koʻp emas”, deya izoh bergan.