Oʻzbekiston Respublikasi Markaziy banki tomonidan Osiyo taraqqiyot banki (OTB) bilan hamkorlikda tijorat banklarining xotin-qizlar va erkaklar uchun teng huquq hamda imkoniyatlarni taʼminlash masalalari boʻyicha maslahat kengashlari uchun seminar tashkil etildi. Seminarda Oliy Majlis Senatining Yoshlar, xotin-qizlar, madaniyat va sport masalalari qoʻmitasi raisi Orzigul Kozixonova va Qoʻmita aʼzosi Malika Kadirxanova ishtirok etdi.

Seminar bank tizimida xotin-qizlar va erkaklar uchun teng huquq hamda teng imkoniyatlarni taʼminlashga qaratilgan institutsional mexanizmlarni yanada mustahkamlash, tijorat banklarida faoliyat yuritayotgan maslahat kengashlari ish samaradorligini oshirish, shuningdek, gender tenglik tamoyillarini izchil joriy etish maqsadida tashkil etildi.

Tadbirda Markaziy bank, tijorat banklari, maslahat kengashlari, tegishli vazirlik va idoralar, xalqaro tashkilotlar hamda rivojlanish boʻyicha hamkor tashkilotlar vakillari ishtirok etdi.

Seminar davomida bank-moliya tizimida gender tenglikni taʼminlashning zamonaviy yondashuvlari, maslahat kengashlari faoliyatining tashkiliy-huquqiy va uslubiy asoslarini takomillashtirish, ularning institutsional boshqaruvdagi rolini kuchaytirish, shuningdek, gender siyosatini amaliyotga tatbiq etishning samarali mexanizmlarini kengaytirish masalalari muhokama qilindi.

Xususan, ish joylarida teng imkoniyatlarni taʼminlash, xotin-qizlarning kasbiy va rahbarlik salohiyatini rivojlantirish, mehnat muhitini yanada takomillashtirish, institutsional hisobdorlikni kuchaytirish, shuningdek, gender koʻrsatkichlarini monitoring qilish va hisobot yuritishning zamonaviy yondashuvlarini joriy etish masalalariga alohida eʼtibor qaratildi.

Seminar doirasida milliy va xalqaro tajriba almashish, ilgʻor amaliyotlarni koʻrib chiqish, shuningdek, tijorat banklari faoliyatida gender tenglikni taʼminlash borasidagi ishlarni yanada takomillashtirishga qaratilgan amaliy tavsiyalar ishlab chiqildi.