Dangʻara tumanining “Pishqaron” MFY ahli keyingi yillarda qandolatchilikda oʻz brendini yaratdi. Bugungi kunda ushbu mahalladagi xonadonlarda tayyorlanayotgan oq qand, novvot-u turli shirinliklar Fargʻona vodiysi viloyatlari, shu bilan birga, mamlakatimizning turli hududlarida xaridorgir mahsulotga aylanib ulgurgan.

Ayni paytda mahalladagi ellikka yaqin xonadon qandolatchilik bilan shugʻullanayotgani mazkur hunar hududning rivojlanish drayveriga aylanganidan dalolat beradi.

Mahalla raisi Manzuraxon Soliyevaning qayd etishicha, eʼtibor va ragʻbat tufayli tadbirkorlik muhiti yaxshilanib, oilalar farovonligi yuksalib bormoqda. Shu bois mahallada har bir oilaning oʻz tadbirkorligi va daromad manbai bor.

Oʻtgan yilning oʻzida yangi ish boshlash istagidagi yoshlarni tadbirkorlikka jalb etish maqsadida tijorat banki tomonidan 60 million soʻm miqdorida imtiyozli kredit ajratib berilishiga koʻmaklashildi. Shuningdek, ikki nafar mahalladoshga 14 million soʻm subsidiya ajratilib, kerakli jihozlar olib berildi.

Yosh tadbirkor Akmaljon Yoʻlchiboyev oʻz xonadonida oq qand ishlab chiqarishni yoʻlga qoʻygan. Hozirda uch nafar mahalladoshini doimiy ish oʻrni bilan taʼminlagan holda kuniga bir tonnadan ziyod shakarni qayta ishlash hamda sifatli oq qand ishlab chiqarishga muvaffaq boʻlishmoqda.

Quvonarlisi, tinib-tinchimas va doimo izlanishda boʻlgan tadbirkor yaqin istiqbolda faoliyatini yanada kengaytirish va oʻz brendini yaratishni maqsad qilgan. Oʻz navbatida mahsulot tayyorlashda qadoqlash jarayonini ham qoʻshish hamda ish oʻrinlarini koʻpaytirishni rejalashtirmoqda. Shu maqsadda mahalladagi hokim yordamchisi bilan maslahatlashib, yangi biznes-reja ishlab chiqdi.

Xonadondagi moʻjazgina sexda davom etayotgan ish jarayonini kuzatish juda ham maroqli. Maxsus tegirmonda unga aylangan shakarga bosqichma-bosqich ishlov berilgach, qolipdan chiqqan oq qand kerakli haroratda quritiladi. Shu tariqa mazasi til yorar shirinlik tayyor. Bu oq qandning xaridorlari bisyorligi sababli xonadonning oʻzidan ulgurji narxda olib ketishadi.

— Pishqaronliklar har jabhada peshqadam, — deydi mahalla raisi Manzuraxon opa. — Qandolat mahsulotlari, ayollar va bolalar liboslari, oyoq kiyimlari, shirin-shakar mevalar, sabzavotlar, xullas, hammasi oʻzimizda muhayyo. Faol tadbirkorlarimiz hatto qoʻshni mahalla yoshlari, xotin-qizlarini ham yuqori daromadli ish oʻrinlari bilan taʼminlagani eʼtiborga sazovordir.

Shuning uchun mahalla infratuzilmasini yaxshilash, obodonlashtirish va koʻkalamzorlashtirish ishlarida ibratli tashabbuslar koʻp. Bu barchamizga cheksiz gʻurur va iftixor baxsh etadi.

Botir Madiyorov, “Xalq soʻzi”.