Toshkent shahrida Oʻzbekiston va Latviya oʻrtasidagi savdo-iqtisodiy hamda investitsiyaviy hamkorlikni rivojlantirishga bagʻishlangan qator tadbirlar boʻlib oʻtdi.

Latviya delegatsiyasi tashrifi doirasida Oʻzbekiston Respublikasi investitsiyalar, sanoat va savdo vaziri Laziz Kudratov hamda Latviya transport vaziri Atis Švinka oʻrtasida muzokaralar oʻtkazildi. Shuningdek, Oʻzbekiston–Latviya Hukumatlararo komissiyasining 9-yigʻilishi va ikki mamlakat davlat idoralari hamda biznes vakillari ishtirokida Oʻzbekiston–Latviya biznes-forumi tashkil etildi.

Tomonlar hamkorlikning bugungi holati va istiqbollarini, sanoat kooperatsiyasini kengaytirish, Markaziy Osiyo va Yevropa Ittifoqi oʻrtasidagi transport-logistika yoʻnalishlarini rivojlantirish, shuningdek raqamli texnologiyalar, qishloq xoʻjaligi va taʼlim sohalaridagi hamkorlikni muhokama qildilar. 2025-yil yakunlariga koʻra oʻzaro savdo hajmi 273,2 mln dollarni tashkil etdi. Tomonlar ushbu koʻrsatkichni oʻrta muddatda 500 mln dollargacha yetkazish niyatini tasdiqladilar.

Biznes-forumda 20 dan ortiq latviyalik kompaniyalar, jumladan Latvijas dzelzceļš, Ventspils Free Port, Elektroniskie sakari, Intellog va MGK Building ishtirok etdi. Mazkur kompaniyalar temir yoʻl infratuzilmasi, port logistikasi, telekommunikatsiya, transport xizmatlari va qurilish texnologiyalari yoʻnalishlarida faoliyat yuritadi.

Tadbirlar yakunida Oʻzbekiston–Latviya va Latviya–Oʻzbekiston ishbilarmonlik hamkorligi kengashlari faoliyatini tiklash toʻgʻrisidagi memorandum hamda iqtisodiy hamkorlikni mustahkamlash boʻyicha Harakatlar rejasi imzolandi. B2B uchrashuvlari oʻtkazilib, logistika, sanoat, qishloq xoʻjaligi va raqamli iqtisodiyot sohalarida qoʻshma loyihalarni ishlab chiqish boʻyicha kelishuvlarga erishildi.