Istanbulda Parlamentlararo ittifoqning 152-assambleyasi doirasida Oliy Majlis Senati Raisi Tanzila Narbayeva Parlamentlararo ittifoqning prezidenti Tuliya Ekson va Bosh kotibi Martin Chungong bilan uchrashuvlar oʻtkazdi.

Uchrashuvlarda Parlamentlararo ittifoqning parlamentlararo hamkorlikni rivojlantirish, demokratik qadriyatlarni ilgari surish va barqaror rivojlanishga koʻmaklashish borasidagi muhim oʻrni qayd etildi. Oʻzbekistonning Parlamentlararo ittifoq bilan hamkorligi jadal rivojlanib, sifat jihatidan yangi bosqichga koʻtarilgani taʼkidlandi. Toshkentda oʻtkazilgan 150-yubiley assambleya yuqori baholandi.

Joriy yilda Parlamentlararo ittifoq rahbariyatining vakolatlari tugashi munosabati bilan tomonlar birgalikdagi ishlar yakunlarini sarhisob qildilar va soʻnggi yillarda parlament hamkorligining asosiy yoʻnalishlari boʻyicha natijalarni muhokama qildilar.

Suhbatdoshlar amalga oshirilayotgan islohotlar va tashabbuslar tufayli Oʻzbekiston parlamenti xalqaro hamjamiyatda oʻz obroʻsi va mavqeini sezilarli darajada mustahkamlaganini taʼkidladi.

Parlamentlararo ittifoq rahbariyati baholaganidek, Oʻzbekistonda oʻtkazilayotgan xalqaro parlament tadbirlari, xususan, Toshkentdagi 150-assambleya namunali boʻlib, yuqori tashkiliy standartlarni belgilab berdi.

Tomonlar joriy yilning 4–6-sentyabr kunlari Samarqand shahrida oʻtkaziladigan Yosh parlament aʼzolarining 12-global konferensiyasiga tayyorgarlik ishlariga alohida eʼtibor qaratdilar. Ushbu anjuman Parlamentlararo ittifoqning har tomonlama koʻmagida yuqori saviyada oʻtishiga ishonch bildirildi.

Muzokaralar yakunida parlament diplomatiyasini mustahkamlash borasidagi hamkorlikni yanada kengaytirish va qoʻshma tashabbuslarni amalga oshirishdan ikki tomon ham manfaatdor ekani tasdiqlandi.