Jurnalistika — juda masʼuliyatli kasb. Jurnalist har bir yozgan soʻzi uchun javob beradi. U jasoratli boʻlsagina, maqolalari ham qiziqarli chiqadi. Taniqli jurnalist va shoir Abdurasul Jumaqulovning hamkasblari jasoratli qalam sohibi, deb biladi. U oltmish dovonni bosib oʻtsa-da, koʻpchilikka yosh koʻrinadigan, tashkilotchi, doim tinib-tinchimas ijodkor. Maʼrifatparvar Abdurauf Fitrat tamal toshini qoʻygan “Hurriyat” mustaqil gazetasining bosh muharriri sifatida har bir soni, har bir sarlavhasi, har bir soʻzi ustida soatlab izlanadi. Yangi fikr, yangi mavzu, yangi mualliflarni izlaydi, qayerda bir narsa “yilt” etsa, shunga eʼtibor beradi. Jurnalistikada bunday tajribali yoʻlni bosib oʻtish faqat haqiqiy isteʼdodli va fidoyi insonlarga nasib etadi.

Oʻzbekiston Yozuvchilar uyushmasida oʻtkazilgan ijodiy uchrashuv Abdurasul Jumaqulovning “Kunduzgi chiroq”, “Faqat sen” kitoblarining taqdimotiga bagʻishlandi. Toʻplamdagi “Tutash tomirlar diyoriga safar”, “Betakror meros qadri”, “Yurtimizning ertasi”, “Shamchiroq” maqolalari va sheʼrlarining badiiy qiymati zukko adabiyotshunoslar tomonidan eʼtirof etildi.

– “Hurriyat” mustaqil gazetasi mamlakatimizdagi nufuzli nashrlardan biridir, – deydi Oʻzbekistonda xizmat koʻrsatgan madaniyat xodimi, professor Xurshid Doʻstmuhammad. – Gazetaning har bir nashri nafaqat axborot manbai, balki aholi uchun muhim muloqot maydoniga aylangan. U turli dolzarb masalalarni koʻtarib chiqmoqda, oʻquvchilar uchun maslahatchi va fikrlar minbari vazifasini bajarmoqda. Bu gazetada maqola chop etish koʻplab jurnalistlar uchun katta sharaf hisoblanadi. “Kunduzgi chiroq” kitobiga kirgan har bir maqolada ham yurtdoshlarimiz taqdiri, ularning kechinmalari va izlanishlari, shu bilan birga, muallifning shaxsiy qarashlari, his-tuygʻulari mujassam. Abdurasul Jumaqulovning onasi oʻn ikki nafar farzand koʻrgan. U doim qaynoq hayot ichida boʻlgan, bu oddiy odamlar hayotini samimiy va haqqoniy yoritishda muhim ahamiyatga ega.

Abdurasul Jumaqulov butun umrini jurnalistikaga bagʻishlagan. Koʻplab jurnalistlar uchun nafaqat hamkasb, balki ustoz hamdir. Yubiley munosabati bilan muallifning hamkasblari, jurnalistlar, doʻstlari va kitobxonlar uning fidoyiligi, maqolalari va sheʼrlari haqida gapirdi. Tantana davomida koʻp yillik mehnati yuksak baholanib, esdalik sovgʻalari topshirildi.

Adiba UMIROVA, “Xalq soʻzi”.