Sogʻliqni saqlash vaziri Asilbek Xudayarov Jahon sogʻliqni saqlash tashkiloti Bosh direktori Tedros Gebreyesus bilan oʻzaro hamkorlikda amalga oshirilayotgan ishlar va kelgusidagi rejalar yuzasidan muloqot qildi.

Uchrashuvda qayd etilganidek, Oʻzbekiston 1992-yil JSSTga aʼzo boʻlgan. Tashkilotning yurtimizdagi vakolatxonasi 1993-yildan buyon faoliyat yuritib kelyapti.

Jahon sogʻliqni saqlash tashkiloti hamda Oʻzbekiston Respublikasi Sogʻliqni saqlash vazirligi oʻrtasidagi hamkorlik izchil rivojlanib bormoqda.

Tomonlar mamlakatda tizimni modernizatsiya qilish, tibbiy xizmatlar sifatini oshirish va aholi salomatligini muhofaza qilishga qaratilgan qator yoʻnalishlarda hamkorlik qilib kelyapti.

Xususan, Oʻzbekistonda epidemiologik nazoratni kuchaytirishda JSSTning koʻmagi katta. Bu, ayniqsa, koronavirus pandemiyasi davrida yaqqol namoyon boʻldi.

Qolaversa, yuqumli va yuqumli boʻlmagan kasalliklarning oldini olish, onalar va bolalar salomatligini yaxshilash, shuningdek, tibbiyot xodimlarining malakasini oshirishga qaratilgan loyihalar amalga oshirilyapti.

Shu bilan birga, raqamli tibbiyotni joriy etish, shoshilinch tibbiy yordam tizimini takomillashtirish va birlamchi tibbiy-sanitariya yordamini kuchaytirishda hamkorlikdagi qoʻshma dasturlar muhim ahamiyat kasb etmoqda.

Hozirda yurtimiz Sogʻliqni saqlash vazirligi va JSSTning Yevropa mintaqaviy byurosi oʻrtasida imzolangan 2025–2030-yillarga moʻljallangan besh yillik hamkorlik dasturi ijrosiga kirishilgan.

Oʻz navbatida, “2026–2030-yillarda Markaziy Osiyoda salomatlik va farovonlikni qoʻllab-quvvatlash boʻyicha ishlab chiqilgan «Yoʻl xaritasi” kelishish bosqichida.

Mazkur hamkorlik Oʻzbekistonda sogʻliqni saqlash tizimi barqarorligini taʼminlash, aholiga koʻrsatilayotgan tibbiy xizmatlar sifatini toʻliq xalqaro standartlar darajasiga olib chiqishga xizmat qiladi.

Uchrashuvda JSST rahbari Tedros Gebreyesus mamlakatimiz tibbiyotidagi transformatsiya jarayonlari va islohotlarning dastlabki amaliy natijalarini yuqori baholadi.

Xususan, aholini malakali birlamchi tibbiy yordam bilan qamrab olish, skrining dasturlari, profilaktik tadbirlar, mahallalardagi patronaj xizmati, sohani raqamlashtirish, ayniqsa, vazirlikdagi “Raqamli sogʻliqni saqlash markazi”, kadrlar malakasini oshirish, ixtisoslashgan xizmatni quyi boʻgʻinga tushirish, shifoxonalar boshqaruviga ilgʻor xorijiy menejmentni tatbiq etish borasidagi mamlakatimiz tajribasi alohida eʼtirof etildi.

Binobarin, mehmon Oʻzbekistonda onalar va bolalar oʻlimi koʻrsatkichining keskin kamayishini quvonarli natija sifatida taʼkidladi. Oʻz navbatida, JSST yurtimizdagi tibbiyot xodimlarining bilim va malakasini oshirishga qaratilgan treninglar oʻtkazishga yaqindan koʻmaklashishini maʼlum qildi.

Muloqotda istiqboldagi oʻzaro hamkorlikka doir yana boshqa masalalar koʻrib chiqilib, qator yoʻnalishlarda muhim kelishuvlarga erishildi.