Pokiston — Osiyoning sanoati rivojlanayotgan agrar mamlakatlaridan biri hisoblanib, Respublikamiz Prezidentining joriy yil fevral oyidagi ushbu mamlakatga davlat tashrifi ikki tomonlama munosabatlar rivojida mutlaqo yangi sahifa ochdi. Tashrif doirasida barcha ustuvor yoʻnalishlarda ikki tomonlama munosabatlarni sifat jihatidan yangi bosqichga olib chiqib, oʻzaro hamkorlik koʻlamini kengaytirishga, mintaqaviy integratsiya jarayonlarini jadallashtirishga xizmat qiladigan shartnomalar imzolandi.

Mazkur kelishuvlar doirasida ayni kunlarda Navoiy viloyati hokimi Normat Tursunov boshchiligidagi delegatsiya amaliy tashrif bilan Pokiston Islom Respublikasida boʻlib, ushbu mamlakatning bir qator hududlarida sanoat, savdo, investitsiya va logistika, tibbiyot sohalarida oʻzaro manfaatli hamkorlikni rivojlantirish, shuningdek, hududlar oʻrtasida toʻgʻridan-toʻgʻri iqtisodiy aloqalarni yoʻlga qoʻyish masalalari yuzasidan muzokaralar oʻtkazdi. Xususan, safarning dastlabki kunida delegatsiya Sind viloyati bosh vaziri Said Murad Ali Shoh bilan ikki hudud oʻrtasida oʻzaro manfaatli hamkorlikni mustahkamlash va istiqbolli investitsiya loyihalarini amalga oshirish boʻyicha amaliy ishlarni davom ettirishga kelishib olindi.

Shu kuni delegatsiya Karachi savdo-sanoat palatasi raisi Muhammad Rexan Xanif bilan muzokaralar oʻtkazib, oʻzaro manfaatli hamkorlikni yanada rivojlantirish, investitsiyaviy aloqalarni kengaytirish hamda qoʻshma loyihalarni amalga oshirish istiqbollarini muhokama qilishdi. Muzokaralar yakunida Muhammad Rexan Xanif joriy yil may oyida karachilik bir guruh tadbirkorlar bilan hududda yaratilgan qulay ishbilarmonlik muhiti, investitsion imkoniyatlar va sanoat salohiyati bilan bevosita tanishish niyatida Navoiy viloyatiga amaliy tashrifni amalga oshirish rejalashtirilayotganini maʼlum qildi.

Karachi — Sind viloyatining maʼmuriy markazi boʻlishi bilan birga Pokistonning eng yirik dengiz porti hisoblanadi. Mamlakat tashqi savdo yuklarining yiliga 60 foizgacha boʻlgan qismini qabul qilib, uning infratuzilmasi Yaqin Sharq, Sharqiy Afrika, shuningdek, Yevropa va Xitoy tomon yoʻnaltirilgan tranzit oqimlari bilan ishlashga imkon beradi. Mazkur port shaharda delegatsiya tomonidan Navoiy — Sind biznes-forumi tashkil etilib, unda Navoiy viloyatining investitsion jozibadorligi, qulay ishbilarmonlik muhiti, xorijiy investorlar uchun yaratilgan keng imkoniyat va preferensiyalar, shuningdek, erkin iqtisodiy zonalar va kichik sanoat zonalarining samarali faoliyati haqida taqdimotlar Sind viloyatining yetakchi tadbirkorlari, yirik kompaniyalar va ishbilarmon doira vakillari eʼtiboriga havola etildi.

— Tadbir doirasida B2B va G2B uchrashuvlar tashkil etilib, tadbirkorlar oʻrtasida toʻgʻridan-toʻgʻri muloqot yoʻlga qoʻyildi, — deydi Navoiy viloyati hokimi oʻrinbosari Elbek Gʻafforov. — Unda qoʻshma investitsiya loyihalarini amalga oshirish, sanoat kooperatsiyasini rivojlantirish, mahsulotlar eksportini kengaytirish hamda logistika yoʻnalishlarini diversifikatsiya qilish masalalari yuzasidan fikr almashildi. Uchrashuv yakuni bilan Navoiy viloyati va “Omni Group of Companies” oʻrtasida uzoq muddatli va strategik hamkorlik uchun mustahkam asos yaratishga kelishib olindi.

Tashrifning ikkinchi kunida navoiylik ishbilarmonlar Pokistonning charm sanoatida faoliyat yuritayotgan yirik kompaniyalaridan biri — “Nova Leathers (Pvt.) Ltd.” rahbariyati, xususan kompaniya bosh direktori Irfon Iqbol bilan muzokara oʻtkazdilar.

Mazkur kompaniya Pokistonda charm mahsulotlarini qayta ishlash va tayyor mahsulot ishlab chiqarish boʻyicha yirik sanoat korxonalaridan biri hisoblanib, unda sigir, qoʻy va echki terilaridan asosan charm kiyim-bosh, sumkalar, sanoat uchun maxsus charm materiallari ishlab chiqariladi.

Kompaniya mahsulotlari dunyoning qator rivojlangan davlatlariga eksport qilinadi. Jumladan, Yevropa mamlakatlari — Kanada va Osiyoning bir qator davlatlari “Nova Leathers” mahsulotlarining asosiy bozorlari hisoblanadi.

Uchrashuvda kompaniya rahbari janob Irfon Iqbol Pokiston charm sanoatida katta tajribaga ega tadbirkor sifatida mazkur tarmoqning eksport salohiyati, zamonaviy ishlab chiqarish texnologiyalari va xalqaro bozor talablari haqida maʼlumot berdi.

Muzokaralar davomida Navoiy viloyatida charmni qayta ishlash sohasini rivojlantirish, zamonaviy texnologiyalarni joriy etish, qoʻshma korxonalar tashkil etish hamda eksportbop mahsulotlar ishlab chiqarish imkoniyatlari muhokama qilindi.

Uchrashuv yakunida charmni qayta ishlash sohasida oʻzaro manfaatli investitsiya loyihalarini amalga oshirish, qoʻshma ishlab chiqarishni tashkil etish va ikki tomonlama iqtisodiy hamkorlikni yanada kengaytirish masalalarini oʻrganish boʻyicha kelishuvga erishildi.

Safar doirasidagi navbatdagi manzilida mamlakatning yetakchi savdo institutlaridan biri — Trade Development Authority of Pakistan (TDAP), Pokiston savdoni rivojlantirish agentligi bosh kotibi Sheryar Taj bilan uchrashuv boʻlib oʻtdi.

Unda Oʻzbekiston, xususan Navoiy viloyati va Pokiston oʻrtasidagi savdo-iqtisodiy hamkorlikni yanada rivojlantirish, tadbirkorlar oʻrtasida toʻgʻridan-toʻgʻri aloqalarni kengaytirish hamda yangi eksport yoʻnalishlarini ochish masalalari muhokama qilindi.

TDAP Pokiston Savdo vazirligi huzurida faoliyat yurituvchi asosiy davlat tashkiloti boʻlib, mamlakat eksportini rivojlantirish va xalqaro savdoni ragʻbatlantirish bilan shugʻullanadi. Maʼlumot oʻrnida taʼkidlash joiz, soʻnggi yillarda TDAP xalqaro savdo missiyalari, biznes forumlar va yirik koʻrgazmalar orqali pokistonlik ishlab chiqaruvchilarni jahon bozorlari bilan bogʻlab kelmoqda. Xususan, TEXPO va FoodAg kabi yirik koʻrgazmalarda oʻnlab davlatlardan minglab tadbirkorlar ishtirok etib, yuz millionlab dollarlik savdo shartnomalari imzolanadi.

Muzokaralar davomida qishloq xoʻjaligi, farmatsevtika, toʻqimachilik, charm sanoati va logistika sohalarida hamkorlikni kengaytirish, shuningdek tadbirkorlar oʻrtasida B2B uchrashuvlar tashkil etish masalalari yuzasidan kelishuvga erishildi.

Shu kuni Navoiy viloyati hokimi boshchiligidagi delegatsiya Pokiston Xalq Partiyasi raisi Bilaval Bhutto Zardari bilan uchrashib, Oʻzbekiston va Pokiston oʻrtasidagi savdo-iqtisodiy hamkorlikni yanada rivojlantirish, chunonchi Navoiy viloyatida qoʻshma investitsiya loyihalarini, davlat-xususiy sherikchilik asosida farmatsevtika sohasida zamonaviy ishlab chiqarish loyihalarini yoʻlga qoʻyish, Pokiston tajribasi va urugʻlaridan foydalangan holda Navoiy viloyatida kartoshka yetishtirishni kengaytirish masalalarini muhokama qildilar. Shuningdek, Navoiy xalqaro aeroporti logistika imkoniyatlaridan samarali foydalangan holda Pokistondan goʻsht mahsulotlarini eksport qilish hamda chorvachilik sohasida hamkorlikni rivojlantirish yuzasidan aniq takliflar bildirildi. Muloqotda Pokiston tomoni Navoiy viloyatiga yirik va mayda shoxli chorva mollarini yetkazib berish, shuningdek chorvachilik tarmogʻini rivojlantirishda amaliy yordam koʻrsatishga tayyor ekanini bildirdi.

Delegatsiya Pokistonning xalqaro farmatsevtika sanoatining yetakchi vakili — “Getz Pharma” kompaniyasi rahbariyati, xususan kompaniya asoschisi, Bosh ijrochi direktori Xolid Mahmud uchrashib, kengaytirilgan muzokaralar olib bordi.

— “Getz Pharma” — Pokistonning eng yirik farmatsevtika kompaniyalaridan biri boʻlib, kompaniyada 7 000 nafardan ziyod mutaxassis faoliyat yuritadi va mahsulotlari dunyoning 30 dan ortiq mamlakatlariga eksport qilinadi, — deya davom etadi E. Gʻafforov. — Ishlab chiqarish jarayonlari xalqaro GMP standartlari asosida tashkil etilgan, kompaniya Jahon sogʻliqni saqlash tashkiloti tomonidan tan olingan korxonalardan.

Muzokaralarda Navoiy viloyatida zamonaviy, eksportbop farmatsevtika ishlab chiqarish quvvatlarini tashkil etish, import oʻrnini bosuvchi va yuqori talabga ega dori vositalarini mahalliylashtirish, ilgʻor texnologiyalar va xalqaro standartlarni joriy etish orqali mahsulot sifati va raqobatbardoshligini oshirish, zamonaviy laboratoriyalar barpo qilish va sifat nazoratini kuchaytirish, farmatsevtika sohasi uchun kadrlar tayyorlash va malaka oshirish dasturlarini yoʻlga qoʻyish, Navoiy viloyatini mintaqaviy farmatsevtika xabiga aylantirish va eksport geografiyasini kengaytirish, logistika va taʼminot zanjirlarini takomillashtirish kabi ustuvor yoʻnalishlar belgilab muhokama qilindi.

Tomonlar amaliy hamkorlikni tizimli yoʻlga qoʻyish, qoʻshma loyihalarni tezkor boshlash hamda “yoʻl xaritasi” ishlab chiqish boʻyicha kelishuvga erishdilar.

Pokistonning yana bir yirik farmatsevtika korxonasi — “Searle” kompaniyasi rahbariyati bilan oʻtkazilgan muzokaralarda sohasidagi hamkorlikni yanada rivojlantirish istiqbollari muhokama etildi.

Muzokaralar chogʻida Oʻzbekiston va Markaziy Osiyo farmatsevtika bozorining yuqori oʻsish surʼatlari, import ulushining kattaligi va mahalliylashtirish imkoniyatlari “Searle” uchun muhim istiqbolli yoʻnalish sifatida qayd etildi. Navoiy viloyati esa ushbu hamkorlik uchun qulay hudud sifatida taqdim etildi. Xususan, erkin iqtisodiy zona imkoniyatlari, kimyo sanoati rivojlangani, xalqaro aeroport va rivojlangan logistika tarmogʻining mavjudligi, mintaqaviy bozorlarga tez chiqish imkoniyatlari yuqori baholandi.

Uchrashuvda hamkorlikni amaliy bosqichga olib chiqish, “Searle” kompaniyasi mutaxassislarini Navoiy viloyatiga taklif etish va loyihalarni joyida oʻrganish boʻyicha kelishuvga erishildi.

Ushbu muloqotlar Oʻzbekiston–Pokiston farmatsevtika sohasidagi hamkorlikni yangi bosqichga olib chiqish, import oʻrnini bosuvchi ishlab chiqarishni yoʻlga qoʻyish va Markaziy Osiyo bozoriga yoʻnaltirilgan yirik loyihalarni amalga oshirish yoʻlida muhim qadam boʻlishi bilan ahamiyatli.

Temur ESHBOYEV, “Xalq soʻzi”.