Joriy yilning 30-aprel kuni xalq deputatlari Olmazor tumani Kengashining navbatdan tashqari 27-sessiyasida tumanda huquqbuzarliklarning oldini olish va ularning profilaktikasi holati, shuningdek jamoat xavfsizligi masalalari muhokama qilindi.

Unda Senat aʼzolari, Bosh prokuratura, Toshkent shahar prokuraturasi, tuman hokimligi, mahalliy Kengash doimiy komissiyalari aʼzolari va deputatlari, huquqni muhofaza qiluvchi organlar, hududiy davlat organlari va tashkilotlari rahbarlari, mahalla fuqarolar yigʻinlari raislari, fuqarolik jamiyati institutlari hamda ommaviy axborot vositalari vakillari ishtirok etdi.

Dastlab Olmazor tumanidagi mahallalarda xavfsiz muhitni yaratish borasida amalga oshirilgan ishlar yuzasidan mutasaddilarning axboroti eshitildi.

Qayd etilganidek, tumandagi ijtimoiy-iqtisodiy va kriminogen vaziyatga taʼsir koʻrsatadigan 20 ga yaqin yoʻnalishlar belgilanib, muvofiqlashtiruvchi shtab, idoralararo ishchi guruhlar shakllantirilgan hamda vazifalar ijrosi yuzasidan kunlik nazorat yoʻlga qoʻyilgan.

Oʻquvchilar davomatini onlayn nazorat qilish maqsadida barcha maktablarda Face ID tizimi yoʻlga qoʻyilgan, 652 ta xonadon oʻrganilib, 42 ta notinch oiladagi muammolar hal qilingan,12 ta “xavfsiz koʻcha” tashkil etilgan, aholi gavjum joylarga 135 ta kamera qoʻyilgan, 535 ta obyekt texnik qoʻriqlovga olingan, koʻp qavatli uylarga 142 ta domofon, 115 ta tashvish tugmalari oʻrnatilgan.

Shundan soʻng Mirzo Ulugʻbek tumanida joriy etilgan raqamli boshqaruv va xavfsizlikning yangi modeli – “Aqlli tuman” platformasi bilan tanishildi.

Ushbu tajribani Olmazor tumanida ham joriy qilish boʻyicha taqdimot bilan tanishildi. Mazkur platformaning asosiy imkoniyatlaridan biri boʻlgan situatsion markaz sunʼiy intellekt yordamida ijtimoiy va kommunal sohalardagi muammolarni uzluksiz monitoring qilish hamda aholi bilan doimiy onlayn aloqa oʻrnatish imkonini berishini inobatga olib, deputatlar tomonidan qoʻllab-quvvatlandi.

Senator A.Eshmuratov tomonidan bugungi kunda tuman mahallalaridagi ahvol, jinoyatchilik koʻrsatkichlari, mahalliy Kengashlar faoliyati samaradorligi, Senat hamda mahalliy Kengashlarning hamkorlik aloqalari boʻyicha fikr-mulohazalar bildirildi.

Sessiya yakunida kelgusida bajarilishi lozim boʻlgan ustuvor vazifalar belgilandi.