Fargʻona shahrida joylashgan Ahmad Fargʻoniy nomidagi istirohat bogʻida Milliy gvardiya Fargʻona viloyati boʻyicha boshqarmasida muddatli harbiy xizmatni oʻtash uchun kelgan yosh askarlar ishtirokida “Vatanga qasamyod” tadbiri boʻlib oʻtdi.

Tantanali tadbirda davlat va jamoat tashkilotlari vakillari, nuroniylar, yoshlar, harbiy xizmatchilarning ota-onalari hamda yaqinlari qatnashdi.

Taʼkidlab oʻtilganidek, yurt himoyasi sharafli, shu bilan birga masʼuliyatli vazifa. Shuning uchun ham bunday sharafli burchni zimmasiga olayotgan har bir farzand qalbida mardlik, jasorat tuygʻulari mujassam boʻlishi kerak.

Nigohlari teran, qadamlari oʻktam boʻlgan yosh askarlar Vatan himoyasiga doimo shay ekanligini namoyish etgan holda “Vatanga sadoqat” qasamyodini qabul qildilar.

— Bugun juda ham baxtiyorman, — deydi muddatli harbiy xizmatchi, oddiy askar Sherzod Abduhalimovning onasi Muhayyo Azimova. — Oʻgʻlim bolalikdan maktabda aʼlo baholarga oʻqib, sport mashgʻulotlarida maʼnan va jismonan barkamol boʻlib ulgʻaydi. U kelajakda harbiy boʻlishni maqsad qilgan. Orzusi ijobati yoʻlida yana bir dadil qadam tashlaganidan juda ham mamnunman.

Shu maʼnoda, ushbu qasamyod shunchaki harbiy anʼana emas, el-u yurt oldidagi muqaddas burchni anglash, bir umr unga sodiq qolishni namoyon etuvchi tadbirdir.

Taʼkidlash oʻrinliki, shu kuni harbiylar ishtirokida jangovar va jismoniy tayyorgarlik boʻyicha tashkil etilgan koʻrgazmali chiqishlar ishtirokchilarda unutilmas taassurot qoldirdi. Yuzma-yuz va samimiy suhbatlarda esa xalq va armiya hamisha yakdil ekanligi taʼkidlandi.

Botir Madiyorov, “Xalq soʻzi”.