Samarqandda “Jamoat salomatligi va xavfsizligini taʼminlash maqsadida transmilliy narkotahdidlarga qarshi kurashish” mavzusidagi global forum ish boshladi.

Oʻzbekiston Respublikasi Prezidenti Administratsiyasi huzuridagi narkotiklar va oʻqotar qurollarni nazorat qilish agentligi hamda BMTning narkotiklar va jinoyatchilik boʻyicha boshqarmasi hamkorligida oʻtkazilayotgan nufuzli anjuman avvalida Oʻzbekiston Respublikasi Prezidenti Shavkat Mirziyoyevning forum qatnashchilariga murojaatini Prezident Administratsiyasi rahbari Saida Mirziyoyeva oʻqib eshittirdi.

Murojaatda mamlakatimizda narkojinoyatlarga qarshi kurashish va bu illatning oldini olish borasida amalga oshirilayotgan ishlar, giyohvandlikning barvaqt oldini olish, samarali davolash, narkojinoyatlarga qarshi kurashish yoʻnalishida 50 dan ortiq davlat va xalqaro tashkilotlar bilan hamkorlik qilinayotgani qayd etilgan. Shuningdek, bu boradagi ishlarni takomillashtirish maqsadida davlatimiz rahbari tomonidan muhim tashabbuslar ilgari surildi.

Forumda BMT narkotiklar va jinoyatlar boʻyicha boshqarmasi ijrochi direktori Bo Matiasen soʻzga chiqdi.

Forumda shuningdek, Birlashgan Millatlar Tashkiloti, Yevropa Ittifoqi, Shanxay hamkorlik tashkiloti, Mustaqil davlatlar hamdoʻstligi, Jahon sogʻliqni saqlash tashkiloti, Jahon bojxona tashkiloti hamda boshqa 20 dan ortiq nufuzli xalqaro tashkilotlar vakillari, 50 ga yaqin davlatdan huquqni muhofaza qiluvchi organlar rahbarlari va 500 dan koʻproq xalqaro ekspertlar hamda soha mutaxassislari qatnashmoqda.

Abdulaziz YOʻLDOSHEV, “Xalq soʻzi”.