Joriy yilning 28-31-may kunlari Polsha Respublikasining Varshava shahrida Mehribonlik uylari tarbiyalanuvchilari oʻrtasida futbol boʻyicha XI jahon chempionati oʻtkazildi. Unda Oʻzbekiston sharafini Toshkent shahridagi 22-son Mehribonlik uyi tarbiyalanuvchilaridan tashkil topgan jamoa munosib himoya qilib, ulkan muvaffaqiyatga erishdi.

Oʻzbekiston terma jamoasi dunyoning 35 davlati vakillari ishtirok etgan nufuzli turnirda oʻzlarining yuksak mahoratini namoyish qildi. Futbolchilarimiz musobaqa davomida oʻtkazgan yettita uchrashuvning barchasida gʻalaba qozonib, final bosqichiga yoʻl oldi. Hal qiluvchi bahsda ham raqiblarini magʻlub etgan jamoamiz jahon chempioni boʻldi

Natijada Oʻzbekiston terma jamoasi Mehribonlik uylari tarbiyalanuvchilari oʻrtasidagi futbol boʻyicha XI jahon chempionatining mutlaq gʻolibi sifatida tarixga kirdi.

Chempionatda Polsha, Chexiya, Slovakiya, Sloveniya va boshqa davlatlardan kelgan yosh sportchilar qatnashdi. Turnir yakunlariga koʻra, oʻzining ishonchli oʻyini va yuqori mahorati bilan ajralib turgan Maksim Islomov musobaqaning eng yaxshi darvozaboni deb topildi.

Bugun, 2-iyun kuni Islom Karimov nomidagi Toshkent xalqaro aeroportida chempionlarni tantanali kutib olish marosimi boʻlib oʻtdi. Unda Ijtimoiy himoya milliy agentligi, hamkor tashkilotlar va ommaviy axborot vositalari vakillari ishtirok etdi. Marosimda sportchilarga Ijtimoiy himoya milliy agentligining esdalik sovgʻalari topshirildi.

Tadbir davomida jurnalistlar yosh chempionlar bilan suhbatlashib, musobaqadagi taassurotlari, kelgusi rejalari hamda erishilgan yutuqlar haqida oʻzlarini qiziqtirgan savollarga javob oldi. Yosh chempionlar bilan suhbatda ularning koʻzlaridagi shijoat va gʻayrat yaqqol sezilib turdi.

Sportchilar mamlakatimizda yaratilgan shart-sharoitlardan mamnun ekanliklarini, oʻzlariga bildirilgan ishonchni oqlaganlaridan faxrlanishlarini taʼkidladi. Ayniqsa, Oʻzbekiston bayrogʻi Polsha osmonida baland koʻtarilgani ular uchun unutilmas his-tuygʻu boʻlganini aytib oʻtishdi.

Shuningdek, yosh futbolchilar kelajakda Oʻzbekistondagi professional futbol klublari va ularning akademiyalaridan taklif olishga umid qilayotganliklarini ham yashirishmadi. Ularning bugungi natijalari va mehnatsevarligi koʻplab yoshlar uchun ibrat boʻlayotganini hisobga olsak, yaqin yillarda ushbu iqtidorli yigitlarni katta futbol maydonlarida koʻrish ehtimoli yuqori.

Maʼlumot uchun, Toshkent shahar 22-sonli Mehribonlik uyi tarbiyalanuvchilaridan iborat jamoamiz 2022-yil 11-17-may kunlari Rossiya Federatsiyasining Sankt-Peterburg shahrida oʻtkazilgan xalqaro musobaqada faxrli 1-oʻrinni, 2023-yil 10-15-avgust kunlari Varshavadagi VIII jahon chempionatida esa 28 ta davlat ichida faxrli 2-oʻrinni egallagan edi.