Oliy Majlis Senatining Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi raisi oʻrinbosari Odiljon Mamatkarimov tomonidan Namangan viloyati Uychi tumanida aholi uchun navbatdagi sayyor qabul tashkil etildi.

Qabul davomida fuqarolardan 15 dan ortiq murojaatlar kelib tushib, ularning aksariyati ichki yoʻllarni obodonlashtirish, xotin-qizlar bandligini taʼminlash hamda “Oilaviy tadbirkorlik” dasturi doirasida imtiyozli kreditlar ajratish masalalariga oid boʻldi. Ushbu murojaatlarning 10 tasi joyida ijobiy hal etildi.

Muddat talab qiladigan masalalar yuzasidan esa tegishli tashkilot va idoralar masʼullariga tegishli koʻrsatmalar berildi, ularning ijrosi qatʼiy nazoratga olindi.

Shuningdek, uchrashuv davomida aholi bilan ochiq muloqot oʻtkazilib, fuqarolarga mamlakatimizda amalga oshirilayotgan islohotlar, yangi qonunchilik tashabbuslari hamda davlat dasturlarining mazmun-mohiyati haqida tushuntirishlar berildi.

Taʼkidlanganidek, bunday sayyor qabullar fuqarolarning muammolarini oʻz vaqtida hal etish, ularning yashash sharoitini yaxshilash hamda davlat organlari faoliyatining ochiqligi va samaradorligini taʼminlashga xizmat qiladi.