Fransiya prezidenti Emmanuel Makron Hoʻrmuz boʻgʻozida yuzaga kelgan vaziyatda ikkala tomon ham aybdor deb hisoblaydi. Uning soʻzlaridan “Interfaks” iqtibos keltirmoqda.

“Amerika tomonining Hoʻrmuz boʻgʻozida maqsadli blokadani saqlab qolish toʻgʻrisidagi qaroridan soʻng, Eron rasmiylari oʻzlarining dastlabki pozitsiyalarini oʻzgartirgan boʻlishi mumkin. Bu ikkala tomon uchun ham xatodir”, — dedi Fransiya yetakchisi.

U “barcha vazminlik qilishi kerakligini” taʼkidladi va vaziyatni diplomatik yoʻl bilan hal etishga yana bir bor chaqirdi.

Makron, shuningdek, Fransiya kemasi Hoʻrmuz boʻgʻozida eronliklar tomonidan hujumga uchragani haqidagi xabarlarni rad etdi. Uning tushuntirishicha, AQSH blokadani olib tashlamaslikka qaror qilganidan soʻng, Eron tomoni xavotirga tushib, ogohlantiruvchi oʻq uzgan. Bu esa fransuz kemasi ham boʻlgan bir qator kemalar ekipajlarini ortga qaytishga majbur qilgan.

“Va ular haq edilar. Fransiya tomoni zarar koʻrmadi va jabrlanmadi”, — deb taʼkidladi Fransiya yetakchisi.

Oʻtgan dam olish kunlari Eron armiyasi Bosh shtabi Tehron rasmiylari Hoʻrmuz boʻgʻozida kemalar harakati ustidan qatʼiy nazoratni tiklaganini eʼlon qildi. Bunga javoban AQSH prezidenti Donald Tramp agar oʻt ochishni toʻxtatish tartibi amal qilish muddati tugagunga qadar Vashington va Tehron kelishuvga erishmasa, u Eron bilan sulhni uzaytirmasligini aytdi.

Shuningdek, Amerika yetakchisi tomonlar kelishuvni rasmiylashtirib boʻlmaguncha, AQSH Eron portlaridagi blokadani olib tashlamasligini qayd etdi.