Toshkent davlat agrar universiteti rektori tashabbusi bilan olima ayollar va talaba xotin-qizlar salomatligini yanada mustahkamlash maqsadida fitnes klub tashkil etildi va bu xushxabar barcha fakultetlar qatori yotoqxonalarga ham yashin tezligida tarqaldi. “Oʻsimliklar himoyasi, agrokimyo va tuproqshunoslik” fakulteti professor-oʻqituvchilari-yu talaba qizlari birinchilardan boʻlib shu yerga kirib kelishdi.

— Sport bilan muntazam shugʻullanish, fitnesga qatnash — farovon hayot, gʻayrat-u shijoat, beqiyos yutuqlar demakdir. Prezidentimiz tomonidan sportni rivojlantirishga benihoya katta eʼtibor qaratilayotganiga hamohang ravishda fitnes klubning ilm dargohining oʻzida paydo boʻlgani barchamizni behad quvontirdi, — deydi universitet oʻqituvchisi, agrokimyoviy muammolar yoʻnalishida tadqiqotlar olib borayotgan olima Intizorxon Boqiyeva. — Oʻnlab qizlar, ustozlar darslardan soʻng safimizga qoʻshiladigan boʻlishdi va bu haqda telegram kanalda yozishdi. Quvonchlisi, salomatligiga befarq boʻlmagan kishilar orasida professor ustozlarimiz ham bor. Hech shubha yoʻqki, bu qulaylik ish samaradorligini yanada oshiradi, kayfiyatni koʻtaradi. Umuman olganda esa universitet rahbariyati nafaqat ilmiy tadqiqotlar-u maʼnaviy -maʼrifiy ishlar qatori taʼlim- tarbiyaga, balki ommaviy sportni rivojlantirishga ham katta eʼtibor qaratmoqda. Ana shu sababli talabalarimiz orasidan jahon va Osiyo chempionlari yetishib chiqmoqda. Ularning safi kelgusida yanada ortadi. Chunki bugunning oʻzidayoq “Shoira Begoyim” va “Dilbarim — baxtim” sport klublarining iqtidorli sport ustalari haftasiga uch karra yoshlar bilan shugʻullanishini eʼlon qilishdi.

Abdunabi ALIQULOV, “Xalq soʻzi”.