Fargʻona tumanining olis hududida joylashgan “Shohimardon” va “Yordon” MFYlarda jami 2130 ta oilada 6 ming 600 nafar aholi istiqomat qiladi. Ushbu mahallalar aholisi uchun munosib turmush sharoitlarini yaratish davlatimiz doimiy eʼtiborida boʻlib, soʻnggi yillarda infratuzilmani yaxshilash, tadbirkorlikni rivojlantirish, taʼlim va tibbiyot sohalarida zamonaviy imkoniyatlarni kengaytirish boʻyicha izchil ishlar amalga oshirilmoqda.

Fargʻona viloyati hokimligi tashabbusi bilan oʻtkazilgan navbatdagi tibbiy koʻrik davomida mazkur mahallalar aholisi keng qamrab olindi. Kasalliklarni barvaqt aniqlash, aniq tashxis qoʻyish va tibbiy-profilaktik suhbatlar oʻtkazish jarayonida 750 nafar fuqaroga amaliy tibbiy yordam koʻrsatildi.

— Ayni paytda hudud aholisiga malakali tibbiy xizmat koʻrsatish maqsadida 1 ta oilaviy poliklinika va 2 ta oilaviy shifokorlik punkti faoliyat yuritmoqda, — deydi “Shohimardon” MFYda joylashgan 64-oilaviy poliklinika mudiri Jasurbek Tirkashev. — Poliklinikamizda 2 nafar umumiy amaliyot shifokori va 2 nafar patronaj hamshirasi mehnat qiladi. Bunday keng qamrovli tibbiy tadbirlar biz uchun katta amaliy koʻmak boʻladi.

Tibbiy koʻrik davomida viloyatdagi ixtisoslashgan tibbiyot muassasalarining tor doiradagi mutaxassislari ishtirokida chuqurlashtirilgan tekshiruvlar oʻtkazildi. Natijada 54 nafar fuqaro viloyat markazidagi ixtisoslashgan shifo maskanlari hamda Fargʻona tumani tibbiyot birlashmasiga davolanish uchun yoʻnaltirildi.

Jumladan, chaqaloq Shukrona Oqboʻtayevada kindik churrasi boʻyicha jarrohlik amaliyoti oʻtkazish zarurligi aniqlanib, Fargʻona shahridagi viloyat koʻp tarmoqli bolalar shifoxonasiga yoʻllanma berildi.

Ayni kunlarda viloyatning barcha shahar va tumanlarida olis mahallalarda yashovchi aholi uchun shunday tibbiy koʻriklar izchil tashkil etilmoqda. Bu esa aholi salomatligini mustahkamlash va kasalliklarning oldini olishda muhim ahamiyat kasb etmoqda.

Botir MADIYOROV, “Xalq soʻzi”.