Senatning Sud-huquq masalalari va korrupsiyaga qarshi kurashish qoʻmitasi hamda xalq deputatlari Yashnobod tuman Kengashining qoʻshma majlisi boʻlib oʻtdi.

Oliy Majlis Senati aʼzolari, Qonunchilik palatasi deputatlari, mahalliy Kengash doimiy komissiyalari aʼzolari va deputatlari, huquqni muhofaza qiluvchi organlar, hududiy davlat organlari va tashkilotlari rahbarlari, mahalla fuqarolar yigʻinlari raislari, fuqarolik jamiyati institutlari vakillari Yashnobod tumanida huquqbuzarliklarning oldini olish va ularning profilaktikasi holati, shuningdek, jamoat xavfsizligi hamda korrupsiyaga qarshi kurashishi masalalarini muhokama qildi.

Qayd etilganidek, 2025-yil 5-mart kuni Oʻzbekiston Respublikasi Prezidenti ishtirokida oʻtkazilgan Korrupsiyaga qarshi kurashish milliy kengashi yigʻilishida, joriy yil 27-yanvarda Toshkent shahrida xavfsiz muhitni shakllantirish hamda jamoat xavfsizligini samarali taʼminlash boʻyicha boʻlib oʻtgan yigʻilishda huquqbuzarliklarning oldini olish, profilaktika, maishiy korrupsiya hamda yashirin iqtisodiyotga qarshi kurashish borasida ustuvor vazifalar belgilandi.

Shuningdek, 2025-yil 26-dekabrda Oʻzbekiston Respublikasi Prezidentining Oliy Majlis va Oʻzbekiston xalqiga Murojaatnomasida ham ushbu masalaga alohida urgʻu berilib, korrupsiya – davlat taraqqiyotiga toʻsiq boʻladigan, adolat va qonun ustuvorligini izdan chiqaradigan jiddiy tahdid ekanligi, 2026-yilda bu illatga qarshi kurashish boʻyicha “favqulodda holat” eʼlon qilinishi taʼkidlandi.

Mazkur vazifalardan kelib chiqib, qoʻshma majlisda tumanda jinoyatchilik hamda korrupsiyaning oldini olish, bozorlarni raqamlashtirish, qurilish sohasida korrupsiyaga qarshi kurashish, yashirin iqtisodiyotni qisqartirish, huquqiy ong va huquqiy madaniyatni oshirish hamda boshqa masalalar muhokama qilindi.

Xususan, Yashnobod tumani Ichki ishlar organlari faoliyatini muvofiqlashtirish boshqarmasi boshligʻi, tuman prokurori hamda qator tashkilotlar rahbarlarining axborotlari eshitildi.

Amalga oshirilgan ijobiy ishlar bilan birgalikda yoʻl qoʻyilgan kamchiliklar taʼkidlanib, davlat organlari va tashkilotlariga kelgusida amalga oshirilishi lozim boʻlgan ishlar yuzasidan tegishli vazifa hamda tavsiyalar berildi.

Muhokamalar yakunida tegishli qarorlar qabul qilindi.