Logistikadagi uzilishlar oqibatida birinchi chorakda qoramol importi 2 karra kamaydi. Bunga tezkor yechim topilib, samolyotda tashiladigan har bir naslli qoramol uchun 4 million soʻmgacha, goʻsht importida transport xarajatining yarmini qoplash yoʻlga qoʻyildi.

Shu bilan birga, tadbirkorlarimiz uchun muqobil transport koridorlarini ham koʻpaytirish zarurligi koʻrsatib oʻtildi. Shu orqali ikkinchi chorakda 45 ming tonna, yil yakunigacha jami 130 ming tonna goʻsht importini taʼminlash zarurligi qayd etildi.

Mutasaddilarga qayerda toʻsiq boʻlsa, qayerda yuk toʻxtab qolsa, tadbirkorlar masala koʻtarishini kutmasdan, onlayn monitoring orqali operativ yechim qilib berish topshirildi.

Hududlarda 478 ming gektarda ozuqa ekinlarini ekish rejalashtirilgan. Lekin Namanganda ozuqa yerining 74 foiziga haligacha ekin ekilmagani, chorvada imkoniyat katta boʻlgan Zarbdor, Qiziltepa va Pop tumanlarida silos ekish boshlanmagani, Amudaryo, Gʻijduvon, Xonqa va Bagʻdodda ham ishlar qoniqarsiz ekani koʻrsatib oʻtildi. Viloyat hokimlariga qoloqliklarni bartaraf etish topshirildi.

Yana 100 ming gektar ekin yerini yangi tizim asosida auksionga chiqarish belgilangan. Har bir kun gʻanimatligi, bu yerlarni tez-tez auksionga chiqarib, ekin ekish zarurligi qayd etildi.

Sanoat plantatsiyasi tashkil qiladigan tadbirkorlarga katta imtiyoz va moliyaviy resurslar berilmoqda. Viloyat hokimlariga bu yil kamida 5 tadan yirik sanoatlashgan meva-sabzavot plantatsiyasini namunali qilib tashkil etish topshirildi.