Oliy Majlis Senati Raisi Tanzila Narbayeva Parlamentlararo ittifoqning 152-assambleyasi doirasida Turkiya Buyuk Millat Majlisi Raisi Numan Kurtulmush bilan uchrashuv oʻtkazdi.

Suhbat chogʻida Taʼkidlanganidek, ikki davlat rahbarlarining mustahkam siyosiy irodasi va oʻzaro ishonchga asoslangan munosabatlari natijasida Oʻzbekiston – Turkiya aloqalari keng qamrovli strategik sheriklik darajasiga koʻtarildi. Soʻnggi yillarda parlamentlararo muloqotlar va oʻzaro tashriflar faollashib, hamkorlik izchil rivojlanib bormoqda.

Uchrashuvda parlamentlararo hamkorlik guruhlari va qoʻmitalar oʻrtasidagi aloqalarni yanada kuchaytirish, muntazam muloqot mexanizmlarini yoʻlga qoʻyish hamda qoʻshma tashabbuslarni ilgari surish muhimligi qayd etildi.

Shuningdek, savdo va investitsiyalar, sanoat, taʼlim, madaniyat va turizm sohalaridagi hamkorlik masalalari atroflicha muhokama qilindi. Oliy darajada erishilgan kelishuvlarning ijrosini taʼminlashda parlament nazoratini kuchaytirish, qonunchilik asoslarini takomillashtirish va hududlararo hamkorlikni kengaytirishga alohida eʼtibor qaratildi.

Tomonlar parlamentlarning tegishli qoʻmitalari oʻrtasida iqtisodiyot, investitsiyalar, innovatsiya, bank-moliya, turizm va madaniy-gumanitar sohalarda muloqotlarni davom ettirish muhimligini taʼkidladi. Shu bilan birga, xalqaro reytinglar, Barqaror rivojlanish maqsadlari, gender tenglik, korrupsiyaga va odam savdosiga qarshi kurashish yoʻnalishlarida hamkorlikni rivojlantirishga tayyorlik bildirildi.

Uchrashuv yakunida parlamentlar oʻrtasidagi hamkorlikni yanada mustahkamlashga qaratilgan 2026–2027-yillarga moʻljallangan “Yoʻl xaritasi” imzolandi.