Samarqand viloyatida fuqaroning kredit mablagʻini oʻzlashtirgan bank xodimi aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Qayd etilishicha, Departamentning Oqdaryo tumani boʻlimi tomonidan oʻtkazilgan tergovga qadar tekshiruvda tijorat banki mutaxassisi X.T. 50 mln soʻm kredit mablagʻi ajratishni soʻrab murojaat qilgan fuqaro J.Sh.ning ishonchiga kirib, unga 17 mln soʻm kredit mablagʻi ajratib berishini aytgan.

Shundan soʻng, J.Sh.ning nomiga ochilgan bank plastik kartasiga 50 mln soʻm kredit mablagʻini tushirib, unga bank tomonidan 17 mln soʻm kredit mablagʻi ajratilganligini aytib, 33 mln soʻmini naqdlashtirib oʻz ehtiyojlari uchun ishlatib yuborgan. Oʻtkazilgan tekshiruv davomida 33 mln soʻmning qaytarilishi protsessual tartibda rasmiylashtirilgan.

Maʼlum qilinishicha, hozirda mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qoʻzgʻatilib, tergov harakatlari oʻtkazilmoqda.