Toshkent shahrida 10-mart – Xalqaro ayol sudyalar kuni munosabati bilan “Odil sudlovni amalga oshirishda ayol sudyalar oʻrni” mavzusida xalqaro konferensiya boʻlib oʻtdi.

Tadbirda senatorlar, sud-huquq tizimi vakillari, xalqaro tashkilotlar ekspertlari hamda xorijiy davlatlardan tashrif buyurgan ayol sudyalar ishtirok etdi.

Mazkur bayram 2021-yil 28-aprel kuni Birlashgan Millatlar Tashkiloti Bosh Assambleyasi tomonidan qabul qilingan 75/274-sonli rezolyutsiya asosida taʼsis etilgan boʻlib, ayol sudyalarning adolatni taʼminlashdagi oʻrnini xalqaro miqyosda eʼtirof etish ramzi hisoblanadi.

Konferensiyada sud-huquq tizimida gender tenglikni taʼminlash, ayol sudyalarning kasbiy salohiyatini oshirish, inson huquqlarini himoya qilishda muvozanatli yondashuvni kuchaytirish masalalari muhokama qilindi.

Qayd etilganidek, mamlakatimizda soʻnggi yillarda sud sohasini takomillashtirishga qaratilgan tizimli islohotlar amalga oshirilmoqda. Bugungi kunda sudyalar korpusida ayollar ulushi izchil ortib bormoqda, ular rahbarlik lavozimlarida ham samarali faoliyat yuritmoqda.

Senatning Mudofaa va xavfsizlik masalalari qoʻmitasi raisi Qutbiddin Burxanov oʻz soʻzida Yangi Oʻzbekistonda xotin-qizlarning davlat va jamiyat hayotidagi faol ishtirokini taʼminlash ustuvor vazifa ekanini taʼkidlab, sud tizimida gender muvozanatini mustahkamlash adolat sifatini oshirish, jamiyat ishonchini kuchaytirish va qonun ustuvorligini taʼminlashga xizmat qilishini qayd etdi.

Konferensiyada Xitoy, Turkiya, Qozogʻiston, Qirgʻiziston va Ozarbayjon davlatlaridan tashrif buyurgan mutaxassislar ishtirok etib, ilgʻor xalqaro tajriba, sud amaliyotida inson huquqlarini taʼminlash, gender zoʻravonlik bilan bogʻliq ishlarni koʻrib chiqishda maxsus yondashuv masalalari yuzasidan fikr almashildi.

Tadbir doirasida mamlakatimizda ilk bor tashkil etilgan Oʻzbekiston ayol sudyalar assotsiatsiyasi faoliyatiga ham alohida eʼtibor qaratildi. Mazkur tuzilma faoliyati ayol sudyalarning kasbiy malakasini oshirish, xalqaro hamkorlikni kengaytirish va sud amaliyotini takomillashtirishga qaratilganligi taʼkidlandi.

Shuningdek, tadbir davomida sud hokimiyati tizimida fidokorona mehnat qilib kelayotgan bir guruh ayol sudyalarimizga mukofotlar topshirildi.