Eron parlamenti spikeri Muhammad-Boqir Qolibof AQSH Prezidenti Donald Tramp mamlakatlar oʻrtasidagi kelishuvlar haqida yolgʻon maʼlumot tarqatayotganini maʼlum qildi. Uning soʻzlaridan TASS iqtibos keltirmoqda.

“Bir soat ichida Qoʻshma Shtatlar Prezidenti yettita bayonot berdi va ularning barchasi yolgʻon. Ular bu yolgʻon bilan urushda gʻalaba qozona olmadilar va muzokaralarda ham albatta muvaffaqiyatga erisha olmaydilar. Blokada davom etsa, Hoʻrmuz boʻgʻozi orqali oʻtish erkin boʻlib qolmaydi”, — dedi u.

Qolibofning qoʻshimcha qilishicha, Hoʻrmuz boʻgʻozi orqali dengiz transportining harakati Tehron bilan kelishilgan holda va u belgilagan yoʻnalish boʻyicha amalga oshiriladi.

Islom Respublikasi parlamenti spikeri Amerika yetakchisining aynan qaysi fikrlarini nazarda tutganiga aniqlik kiritmadi.

Eslatib oʻtamiz, kecha Donald Tramp bir nechta bayonotlar bergan edi. U AQSH va Eron vakillari Islom Respublikasidan boyitilgan uranni olib chiqib ketish bilan birgalikda shugʻullanishini maʼlum qilib, Tehron goʻyoki Vashingtondan hech qanday muzlatilgan aktivlarni olmasdan, yadroviy dasturini muddatsiz toʻxtatib turishga tayyorligini aytgan edi. Amerika yetakchisi Eron bilan tuzilishi mumkin boʻlgan kelishuv shartlarining katta qismi allaqachon kelishib boʻlinganini taʼkidlagan.

Bunga javoban Eron TIV vakili Ismoil Baqoiy Islom Respublikasi boyitilgan uranning mamlakatdan olib chiqib ketilishiga yoʻl qoʻymasligini bildirdi.