AQSH Prezidenti Donald Tramp Eron yadroviy dastur masalasida kelishuvga erishishga qodir emasligini maʼlum qildi. Tegishli post Truth Social ijtimoiy tarmogʻida eʼlon qilindi.

“Eron oʻzini qoʻlga ololmayapti. Ular yadroviy qurolni tarqatmaslik toʻgʻrisida qanday qilib kelishuv tuzishni bilishmaydi. Ular tezroq hushini yigʻib olgani maʼqul!” — deb yozdi Amerika yetakchisi.

Avvalroq Axios portali Eron AQSHga Hoʻrmuz boʻgʻozini ochish va urushni toʻxtatishni nazarda tutuvchi taklif yuborgani haqida xabar bergan edi.

Taxminlarga koʻra, oʻt ochishni toʻxtatish tartibi uzoq muddatga uzaytiriladi yoki tomonlar urushni uzil-kesil yakunlash boʻyicha kelishuvga erishadilar.

Eron yadroviy dasturi boʻyicha muzokaralar Hoʻrmuz boʻgʻozi ochilib, Eron portlari blokadasi yechilganidan keyin boshlanishi koʻzda tutilgan.