Oʻzbekiston Respublikasi Oliy taʼlim, fan va innovatsiyalar vaziri Qoʻngʻirotboy Sharipov BRS Secretariat Ijrochi kotibi Rolf Payet bilan uchrashuv oʻtkazdi.

Uchrashuvda BRS – Bazel, Rotterdam va Stokgolm konvensiyalari doirasidagi hamkorlik, kimyoviy xavfsizlik, xavfli chiqindilarni boshqarish, barqaror rivojlanish va ilmiy tadqiqotlar yoʻnalishidagi hamkorlikni kengaytirish masalalari atroflicha muhokama qilindi.

Vazir Qoʻngʻirotboy Sharipov soʻnggi yillarda mamlakatimizda atrof-muhitni muhofaza qilish, ekologik xavfsizlikni taʼminlash hamda chiqindilarni barqaror boshqarish sohasida amalga oshirilayotgan institutsional va huquqiy islohotlar haqida maʼlumot berdi. Xususan, xalqaro ekologik konvensiyalar boʻyicha milliy majburiyatlarni bajarish yuzasidan qonunchilik takomillashtirilayotgani, davlat idoralari oʻrtasidagi muvofiqlashtirish mexanizmlari kuchaytirilayotgani taʼkidlandi.

Shuningdek, oliy taʼlim va ilm-fan tizimida ekologik yoʻnalishlar boʻyicha kadrlar tayyorlash, ilmiy tadqiqotlarni qoʻllab-quvvatlash va universitetlarni tadqiqotga yoʻnaltirilgan muassasalarga aylantirish borasidagi ishlar haqida axborot berildi. Ekologiya, kimyo texnologiyalari, atrof-muhit muhandisligi, sanoat xavfsizligi kabi sohalarda taʼlim dasturlari modernizatsiya qilinmoqda.

Rolf Payet oʻz navbatida Oʻzbekiston bilan hamkorlikni mustahkamlashga tayyor ekanini bildirib, BRS kotibiyati tomonidan texnik koʻmak, bilim almashinuvi va ilmiy-amaliy tashabbuslarni qoʻllab-quvvatlash imkoniyatlari mavjudligini taʼkidladi.

Uchrashuv yakunida konvensiyalar doirasida ilmiy salohiyatni mustahkamlash, universitetlar va xalqaro tuzilmalar oʻrtasida hamkorlikni kengaytirish, hamda ekologik barqaror rivojlanish sohasida qoʻshma loyihalarni amalga oshirish boʻyicha kelishuvlarga erishildi.