Aprel oyining oʻrtasida Termiz tumanida oʻriklar pishib yetildi. Hajman salkam olmaga teng bu mevalar koʻzni quvnatadi. Buni hududdagi quyosh nuri va unumdor tuproq uygʻunligi desak, yana bir muhim jihat borki, bu ham boʻlsa, bogʻbonning sabr-toqati, matonati va mehnati samarasi ekanidadir.

Bogʻbon Ikrom Usmonov toʻqqiz yil avval “Asaka yaltiroq” navli oʻrik koʻchatlarini ekib, ularni parvarish qildi. Biroq bu nav kutilgan natijani bermadi. Oʻtgan yili esa u daraxtlarni “Mikado” naviga payvand qildi va qisqa vaqt ichida ijobiy natijaga erishdi.

— Salkam oʻn yildan beri bogʻdorchilik bilan shugʻullanaman, — deydi bogʻbon Ikrom Usmonov. — Prezidentimiz tomonidan yaratilayotgan imkoniyatlar, jumladan, subsidiyalar ajratilishi va yer maydonlarining berilgani soha rivojiga turtki boʻlmoqda. Bugungi kunda bogʻimda 300 tupdan ziyod yuqori hosildor oʻrik daraxtlari bor. Oʻtgan yili payvand qilingani sababli joriy yilda ilk hosildan bir tonnadan ortiq mahsulot olishni rejalashtiryapman. Keyingi yillarda hosil 4–5 tonnaga yetishi kutilmoqda. Toʻliq hosilga kirganda har bir daraxtdan 50 kilogrammdan ziyod meva olish mumkin.

Ayni paytda eksport qiluvchi korxona vakillari oʻrik hosilini 180–200 ming soʻmdan xarid qilib olishmoqda. Bu esa mavsumning faol davri boshlanganini koʻrsatadi.

Bu hali hammasi emas, bogʻ atrofidagi bir gektar boʻsh maydonlarda ekilgan ertapishar qovunlar ham quyoshli kunlar shu tarzda davom etsa, yaqin bir hafta ichida pishib yetilib, bozorlarimizni yana bir mahsulot bilan boyitadi.

Termiz tumani Surxondaryo viloyatining eng issiq hududlaridan biri hisoblanadi. Shu bois bu yerda meva-sabzavot mahsulotlari ancha erta pishadi. Oʻtgan yili tuman mirishkorlari tomonidan 15 ga yaqin davlatga 110 million dollarlik mahsulot eksport qilindi. Joriy yilda ham eksport hajmini oshirish imkoniyatlari mavjud.

— Hududimizda bunday muddatda oʻrik pishgani avval kuzatilmagan, — deydi Agrosanoatni rivojlantirish agentligi Termiz tumani loyiha ofisi rahbari Qahramon Toʻrayev. — Tumanda ming gektardan ortiq bogʻlar mavjud boʻlib, shundan 490 gektari intensiv bogʻlar hisoblanadi. Ularda resurs tejamkor texnologiyalar joriy etilgan. Bugungi natijalarni ana shu yondashuvlarning samarasi deyish mumkin.

Xulosa qilib aytganda, harakat qilgan odam oʻz roʻzgʻorini ham obod qiladi, bozorlarimizni ham sifatli mahsulot bilan taʼminlaydi.

Farhod ESONOV, “Xalq soʻzi”.