AQSH Prezidenti Donald Tramp va uning milliy xavfsizlik boʻyicha jamoasi vakillari Eronning muzokaralar boʻyicha uch bosqichli rejasiga shubha bilan qarashdi. Bu haqda The Wall Street Journal xabar bermoqda.

Nashr suhbatdoshlarining qayd etishicha, Amerika yetakchisi Islom Respublikasining taklifini toʻgʻridan-toʻgʻri rad etmagan, biroq Tehron Vashingtonning uranni boyitishdan voz kechish boʻyicha asosiy talabini bajarishni istamayotganini taʼkidlagan.

AQSH Eron bilan muzokaralarni davom ettiradi, Islom Respublikasi rejasiga nisbatan javob va qarshi takliflar yaqin kunlarda taqdim etiladi.

Avvalroq Eron vositachilar orqali AQSH bilan muzokaralar olib borishga tayyor boʻlgan uch bosqichli rejani topshirgani xabar qilingan edi.

Eron tomoni muzokaralarning birinchi bosqichi urushni tugatish va Eron hamda Livanga qarshi harbiy harakatlar qayta tiklanmasligi boʻyicha kafolatlar olishga qaratilishini talab qilmoqda.

Ikkinchi bosqich nizo yakunlanganidan keyin Hurmuz boʻgʻozini boshqarish masalasi boʻlishi kerak.

Uchinchi bosqich Tehronning yadroviy dosyesiga tegishli boʻladi. Eron tomoni dastlabki ikki masala boʻyicha kelishuvga erishilmasdan turib, ushbu mavzuni muhokama qilishdan bosh tortmoqda.