Xorazm viloyat veterinariya va chorvachilikni rivojlantirish boshqarmasi boshligʻi Sherzod Abidov tashabbusi bilan Xalqaro veterinariya kuniga bagʻishlangan tantanali tadbir oʻtkazildi. Unda viloyatdagi barcha veterinariya mutaxassislari, ustozu shogirdlar ishtirok etishdi.

—Avvalo barchangizni, ustozlaru yosh mutaxassislarni Xalqaro veterinariya kuni bilan samimiy tabriklayman. Har bir vetuchastkada faollik, jonkuyarlik boʻlsa yutuqlar yaqqol koʻzga tashlanadi. Odamlarning faoliyatimizga boʻlgan hurmati oshadi, — dedi tadbirda soʻz olgan Sherzod Abidov. — Bugun xavfli kasalliklarga qarshi emlash tadbirlarida viloyatimiz hokimi, deputatlar, butun aholi, chorvador fermerlar qatori mahalla raislari ham bizga yaqindan koʻmakdosh boʻlishga, veterinariya xodimlari bilan hamkorlikda ishlashga intilyapti. Yangibozor tumanidan Doniyor Ismailov,Urganch tumanidan Uchkun Sotipov, Xiva tumanidan Bobur Kenjayev, Haydarbek Kurbonboyev. E-he, bu roʻyxatni yana davom ettirsam boʻlaveradi. Lekin eng muhimi mahallabay, xonadonbay ishlash tizimi chorvachilik sohasidagi muammolarni bartaraf etishga, sunʼiy urugʻlantirish asnosida naslchilikni yanada yaxshilashga yoʻl ochayotir. Bunda har biringizning hissangiz bor. Birgina sunʼiy urugʻlantirish salmogʻi oʻtgan yillarga ikki karra oshdi. Chorvachilik tarmogʻidagi oʻzgarishlar ham beqiyos. Bu oʻz navbatida viloyatimiz hokimining qoʻllab quvvatlovi natijasidir. Aholi qaramogʻidagi jonivorlarning koʻpayishi esa kambagʻallikni yanada kamaytirishga turtki beradi. Ana shu sababli ham sizlarga sogʻlik salomatlik tilagan holda ishingizda yanada unum, yutuqlar tilayman.

Tadbirda epizootik tadbirlar ijrosiga bagʻishlangan videolavha namoyish etildi. Shundan soʻng boshqarma boshligʻi bayram munosabati bilan oʻz faoliyati bilan el hurmatini qozonib kelayotgan 150 nafar ortiq mutaxassislarga veterinariya anjomlari solingan maxsus sovgʻalarni topshirdi. Bir piyola choy ustida davom etgan bayram tadbiri xorazmcha laparlaru kuy-qoʻshiqlarga ulanib ketdi.

Abdunabi Aliqulov, “Xalq soʻzi”.