“Mundial sari” ruknining dastlabki ikki sonida Jahon chempionati “A” guruhi vakili JAR va Meksika termalari haqidagi maʼlumotlarga toʻxtalib oʻtgan edik. Mazkur guruhdagi jamoalar bilan tanishishda davom etamiz. Bugungi soʻzimiz Janubiy Koreya milliy terma jamoasi haqida boʻladi.

Umumiy maʼlumotlar

Janubiy Koreya futbol assotsiatsiyasi 1933-yilda tashkil etilgan. Ushbu mamlakat 1948-yildan beri FIFAning aʼzosi hisoblanadi. Shuningdek, mamlakat 1954-yilda Osiyo Futbol Konfederatsiyasiga, yaʼni OFKning rasmiy aʼzosiga aylangan.

Janubiy Koreya milliy terma jamoasi tarixdagi dastlabki oʻyinini 1948-yilning 2-avgust sanasida Meksika terma jamoasiga qarshi oʻtkazgan va mazkur bahsda 5:3 hisobida gʻalaba qozongan. Janubiy Koreya termasi tarixdagi eng yirik gʻalabasini Nepal termasi ustidan qoʻlga kiritgan. 2003-yil Inchxon shahrida boʻlib oʻtgan mazkur bahsda koreyslar 16:0 hisobida gʻalaba qozongan.

Janubiy Koreya milliy terma jamoasi futbol boʻyicha Jahon chempionatlarida jami 11-marta ishtirok etgan. Jamoaning mundialdagi dastlabki ishtiroki 1954-yilda kuzatilgan boʻlib, oʻshanda jamoa musobaqadagi ishtirokini guruh bosqichida yakunlagan. Janubiy Koreyaning Jahon chempionatlaridagi eng yaxshi natijasi toʻrtinchi oʻrin hisoblanadi. Ushbu terma jamoa 2002-yili oʻz maydonida boʻlib oʻtgan mundialda turnirning yarim finaliga qadar yetib bora olgan.

Janubiy Koreya milliy terma jamoasi OFK Osiyo kubogi musobaqasida 15-marta ishtirok etgan va ushbu turnirlarning 2 tasida chempionlikni qoʻlga kiritgan.

Shuningdek, Janubiy Koreya terma jamoasi 2001-yil FIFA tomonidan tashkil etilgan Konfederatsiyalar kubogi musobaqasida ham mezbon sifatida qatnashgan va oʻz ishtirokini guruh bosqichida yakunlagan.

Jahon chempionati sari bosib oʻtgan yoʻli

Osiyoda Jahon chempionati saralashi 4 ta asosiy bosqichdan iborat. Janubiy Koreya terma jamoasi saralashdagi ishtirokini 2-bosqichdan boshladi.

Jamoa 2-bosqichda “C” guruhidan oʻrin oldi. Guruhda koreyslardan tashqari Xitoy, Singapur va Tailand terma jamoalari bor edi. Yakunda Janubiy Koreya terma jamoasi oʻtkazgan 6 ta oʻyinning 5 tasida gʻalaba qozonib, 1 tasida durang oʻynagan holda 16 ochko bilan birinchi oʻrinni egallab, 3-bosqichga yoʻl oldi.

Ushbu bosqichda Son Xyon Min boshchiligidagi jamoa “B” guruhidan oʻrin egalladi. Guruhda koreyslardan tashqari Iordaniya, Iroq, Ummon, Falastin va Quvayt terma jamoalari ham bor edi.

Saralashning bu bosqichi Koreya uchun ancha qiyin oʻtdi. Terma jamoaning oʻz maydonida Falastin va Ummon kabi jamoalar bilan durang oʻynagani ham buni isbotlaydi. Ammo yakunda tajriba oʻz soʻzini aytdi va muhim oʻyinlarda gʻalaba qozongan jamoa 22 ochko bilan guruhda birinchi boʻlib, Osiyoda birinchilardan boʻlib mundialga toʻgʻridan-toʻgʻri yoʻllanmani qoʻlga kiritdi.

Soʻnggi oʻyinlar natijalari

Janubiy Koreya terma jamoasi 2025–2026-yillarda jami 13 ta oʻyin oʻtkazdi. Ularning 8 tasida gʻalaba qozondi, 1 ta oʻyinda durang qayd etildi va 4 ta oʻyinda magʻlub boʻldi.

Jamoa oʻrtoqlik oʻyinlarida Braziliya, Kot-dʼIvuar va Avstriyaga magʻlub boʻlgan boʻlsa-da, AQSH, Paragvay, Boliviya va Gana termalarini magʻlub etishni ham uddaladi.

Bosh murabbiy

Ayni vaqtda Janubiy Koreya terma jamoasini mahalliy mutaxassis Xon Myon Bo boshqarmoqda. 57 yoshli murabbiy terma jamoani 2024-yil iyul oyidan beri boshqarib kelmoqda.

Xon Myon Bo bunga qadar Janubiy Koreya U-20 va U-23 terma jamoalarida, shuningdek Rossiyaning “Anji” va Janubiy Koreyaning “Ulsan HD” klublarida faoliyat olib borgan.

U “Ulsan HD” klubi boshqaruvida ikki marta K liga chempioni boʻlgan va yoshlar bilan Osiyo oʻyinlarida sovrindorlikka erishgan.

Futbolchilar

Ayni vaqtda Janubiy Koreyalik eng mashhur futbolchilar haqida gap ketsa, quyidagilarni eslab oʻtish mumkin:

Son Xyon Min – (“Los Anjeles Gelaksi”, AQSH);

Kan In Li (“PSJ”, Fransiya);

Kim Min Je – (“Bavariya”, Germaniya);

Xvan Xi Chan – (“Vulverhempton”, Angliya);

Xyon Gyu O (“Beshiktosh”, Turkiya).

Jahon chempionatidagi oʻyinlari va uchrashuvlar sanasi

Janubiy Koreya milliy terma jamoasi Jahon chempionati mezboni sifatida turnirning “A” guruhidan oʻrin oldi. Guruhda Janubiy Koreyadan tashqari Meksika, Chexiya va Janubiy Afrika Respublikasi terma jamoalari ham mavjud.

Ushbu terma jamoalarga qarshi bahslar quyidagi sanalarda boʻlib oʻtadi:

Janubiy Koreya – Chexiya (12-iyun);

Meksika – Janubiy Koreya (19-iyun);

JAR – Janubiy Koreya (25-iyun).

Jamoaning mundialdagi imkoniyatlari

Janubiy Koreya milliy terma jamoasi Jahon chempionatlarida doimo oʻzidan kutilgan oʻyinni namoyon eta olgan va bu gal ham juda koʻplab mutaxassislar ushbu jamoaga katta qiziqish bildirmoqdalar.

Janubiy Koreya terma jamoasi oʻz guruhidagi istalgan raqibga qarshi kurash olib bora oladi va ulardan deyarli hech biridan kuchsiz emas. Katta ehtimol bilan jamoa guruhdan chiqishni uddalaydi. Ammo, Koreyaning musobaqadagi ishtiroki katta ehtimol bilan nimchorak final bosqichida yakunlanishi mumkin.