Qishloq xoʻjaligi vaziri Ibrohim Abdurahmonov BMT Taraqqiyot Dasturining Oʻzbekistondagi doimiy vakili Akiko Fujini qabul qildi.

Muloqotda agrar sohada amalga oshirilayotgan qoʻshma tashabbuslarning bugungi natijalari hamda istiqboldagi ustuvor yoʻnalishlar muhokama qilindi.

Tomonlar ikki tomonlama hamkorlik doirasida amaliyotga tatbiq etilayotgan loyihalarning joriy holatini tahlil qilar ekan, ularning samaradorligini oshirish, hududlar kesimida natijadorlikni kuchaytirish va amaliy mexanizmlarni takomillashtirish masalalariga alohida eʼtibor qaratdilar.

Xususan, zamonaviy agrotexnologiyalarni joriy etish, qishloq joylarda bandlikni taʼminlash va kichik ishlab chiqaruvchilarni qoʻllab-quvvatlash yoʻnalishidagi ishlar ijobiy baholandi.

Tomonlar Orolboʻyi mintaqasida amalga oshirilayotgan ekologik va ijtimoiy loyihalarga ham toʻxtalib oʻtdilar. Ushbu hududda yer degradatsiyasini kamaytirish, suv resurslarini tejash, aholi bandligini taʼminlash hamda yashil iqtisodiyot tamoyillarini keng joriy etish borasidagi saʼy-harakatlar yuksak baholandi.

Orolboʻyi uchun maxsus dasturlar doirasida agroekotizimlarni tiklash va iqlimga moslashuvchan qishloq xoʻjaligini rivojlantirish ustuvor vazifa sifatida belgilandi.

Shuningdek, uchrashuvda HECI tamoyillarini amaliyotga joriy etish masalalari yuzasidan ham fikr almashildi. Mazkur yondashuv inson kapitalini rivojlantirish, ekologik barqarorlikni taʼminlash va institutsional samaradorlikni kuchaytirishga xizmat qilishi bilan ahamiyatlidir.

Uchrashuv yakunida tomonlar oʻzaro ishonch va ochiqlikka asoslangan hamkorlikni kengaytirish, loyihalarni aniq natijalar bilan amalga oshirish boʻyicha kelishib oldilar.