Oliy Majlis Qonunchilik palatasidagi “Milliy tiklanish” demokratik partiyasi fraksiyasi yigʻilishida “Kelib chiqish joy nomlari va geografik koʻrsatkichlar toʻgʻrisidagi Lissabon bitimining Jeneva aktiga (Jeneva, 2015-yil 20-may) Oʻzbekiston Respublikasining qoʻshilishi haqida”gi qonun loyihasi muhokama qilindi.

Soʻnggi yillarda Oʻzbekiston Jahon savdo tashkilotiga aʼzo boʻlish yoʻlida koʻplab xalqaro shartnomalarga qoʻshilyapti. Jeneva akti ham ana shunday hujjatlardan biri boʻlib, u orqali tovar kelib chiqqan joy nomlari va geografik koʻrsatkichlar Butunjahon intellektual mulk tashkiloti doirasidagi yagona qoidalar asosida muhofaza qilinadi.

Geografik koʻrsatkichlar xalqaro amaliyotda keng tarqalgan boʻlib, birgina Yevropa Ittifoqi davlatlarida 3000 dan ortiq geografik koʻrsatkichlar va tovar kelib chiqqan joy nomlari roʻyxatdan oʻtkazilgan.

Tashabbuskorlar Oʻzbekistonning ushbu hujjatga qoʻshilish zarurati haqida toʻxtalib, bu dunyoga ochilayotgan Oʻzbekistonning turizm salohiyatini yanada kengaytirishga, ayniqsa, geografik nomlar bilan bogʻliq hududiy brendlar mashhurligini oshirishda muhim ahamiyatga ega boʻlishini taʼkidladi. Jeneva akti esa aynan bunday munosabatlarni xalqaro miqyosda tartibga soladi. Yaʼni, Oʻzbekistonning joy nomlari bilan bogʻliq milliy mahsulotlari Jeneva akti orqali xalqaro miqyosda huquqiy jihatdan himoya qilinadi. Bugungi kunda ushbu tizimdan 1060 ta tovar roʻyxatdan oʻtkazilgan.

Deputatlar tomonidan qayd etilishicha, endilikda Jeneva aktiga qoʻshilish orqali maʼlum bir hududga xos, ayniqsa, qishloq xoʻjaligi va hunarmandchilikka oid mahsulotlarimizni xalqaro darajada ham ommalashtirish imkoniyatiga ega boʻlamiz. Bu mintaqaviy brendlarni rivojlantirish, bozor munosabatlarini yaxshilashga xizmat qiladi.

Fraksiya aʼzosi Nodir Tilavoldiyev Oʻzbekistonning deyarli barcha hududlarida geografik koʻrsatkichlar sifatida roʻyxatdan oʻtkazilishi mumkin boʻlgan noyob mahsulotlar koʻpligini taʼkidlab, Oʻzbekistonning Jeneva aktiga qoʻshilishi, shubhasiz, hududlarga sayyohlar oqimining koʻpayishiga, “gastronomik turizm” rivojlanishiga, ayniqsa, Oʻzbekistonning xalqaro maydondagi imijini yanada yaxshilanishiga xizmat qilishini taʼkidladi.