26:T723,

1-iyun – Xalqaro bolalarni himoya qilish kuni munosabati bilan parlament yuqori palatasida senatorlarning Bolalar harakati sardorlari bilan uchrashuvi boʻlib oʻtdi.

Qayd etilganidek, mamlakat taraqqiyoti, avvalo, barkamol, bilimli va vatanparvar avlodni tarbiyalash bilan chambarchas bogʻliq. Shu bois bolalarning huquq va manfaatlarini taʼminlash, ularning ovozini eshitish hamda qaror qabul qilish jarayonlarida ishtirokini kengaytirish davlat siyosatining ustuvor yoʻnalishlaridan biri hisoblanadi.

Uchrashuv davomida mamlakatimizda bolalarning huquq va manfaatlarini taʼminlash, ular uchun munosib shart-sharoitlar yaratish, sifatli taʼlim va tibbiy xizmatlardan foydalanish imkoniyatlarini kengaytirish borasida amalga oshirilayotgan islohotlar haqida batafsil maʼlumot berildi.

Xususan, keyingi yillarda bolalar huquqlarini himoya qilishning huquqiy asoslari yanada mustahkamlanib, ularni har qanday zoʻravonlikdan himoya qilish, ijtimoiy himoyaga muhtoj bolalarni qoʻllab-quvvatlash, taʼlim va tarbiya sifatini oshirish hamda yosh avlodning iqtidori va isteʼdodini roʻyobga chiqarishga qaratilgan keng koʻlamli chora-tadbirlar amalga oshirilmoqda.

Muloqot jarayonida Bolalar harakati sardorlari va Yoshlar parlamenti aʼzolari oʻz chiqishlarida tengdoshlarini qiziqtirayotgan dolzarb masalalar, yoshlar tashabbuslari hamda bolalarning jamiyat hayotidagi ishtirokini yanada kengaytirishga oid taklif va mulohazalarini bildirdi.

Uchrashuv mobaynida ishtirokchilar Senat faoliyati, parlament ish jarayonlari haqida ham batafsil maʼlumot oldi.