Prezidentimiz videoselektor yigʻilishida mintaqamizda maishiy kimyo mahsulotlari boʻyicha 2 milliard dollarlik bozor mavjudligiga toʻxtaldi.

Misol uchun, “Angren” erkin iqtisodiy zonasidagi tadbirkor dunyoga mashhur “Henkel” kompaniyasi bilan hamkorlikni yoʻlga qoʻygan. Hozirda “Henkel” ushbu korxonani sotib oldi va shu yerdan Hamdoʻstlik davlatlariga mahsulot yetkazib berishni reja qilmoqda.

Bunday loyihalarni koʻpaytirish maqsadida poytaxtdagi sanoat zonalaridan biridagi maydonlar maishiy kimyo loyihalari uchun beriladi.

Ishga tushirilgan korxonalarni brendi bilan birga tayyor daromadli biznes sifatida xususiy sektorga sotish sharti bilan loyihalarga 50 million dollar ajratilishi reja qilindi.

Boshqa viloyatlardagi bunday loyihalarga Sanoat kooperatsiyasi jamgʻarmasidan 15 million dollar yoʻnaltiriladi.

Umuman, mutasaddilarga maishiy kimyoda yana kamida 100 ta brend mahsulot ishlab chiqarishni yoʻlga qoʻyish boʻyicha dastur ishlab chiqish topshirildi.

Tahlillarga koʻra, dunyoda mineral oʻgʻitga talab yiliga 5 foizdan oʻsib, 2030-yilda 260 milliard dollardan oshadi.

Ayniqsa, yangi agrotexnologiyalar hisobiga suvda eruvchan oʻgʻitga boʻlgan ehtiyoj keskin koʻpaymoqda.

Investorlar bilan muzokaralar natijasida Qashqadaryoda yillik quvvati 230 ming tonna boʻlgan 114 million dollarlik, Sirdaryo viloyatida 400 million dollarlik loyihalarni amalga oshirish boʻyicha kelishuvga erishildi.

Umuman, uch yilda soha masʼullari va hokimlar oldida 2 milliard 800 million dollarlik 42 ta loyihani ishga tushirish vazifasi turgani qayd etildi.

Bu orqali 2030-yilga borib, azotli oʻgʻit ishlab chiqarish hajmini 2,8 milliondan 4 million tonnaga, fosforli oʻgʻitni 400 mingdan 900 ming tonnaga, suvda eruvchan oʻgʻitlarni 100 mingdan 400 ming tonnaga yetkazish muhim ekani taʼkidlandi.