Qoʻshtepa tumanidagi “Eshonguzar” MFY ahli azaldan dehqonchilikdagi mirishkorligi bilan mashhur. Ayni paytda uzumchilik mahallaning iqtisodiy rivojlanish drayveri sifatida belgilangan. Bugungi kunda hududdagi 85 foiz oila uzum yetishtirish bilan shugʻullanadi.

Tomorqadan foydalanishda omilkorligi bilan tanilgan Umarjon Zokirovlar oilasi bundan uch yil oldin tajriba tariqasida issiqxonada intensiv usulda gilos yetishtirishni yoʻlga qoʻygan edi. Astoydil qilingan mehnat va izlanish oʻz samarasini berib, ayni kunlarda issiqxonada gilos pishdi.

— Bu gilos navi asosan AQSH, Turkiyada ekiladi va aprel oyida toʻliq hosilga kiradi, — deydi xonadon sohibi. — Ilmiy-amaliy tajribalarimiz mahalliy sharoitda ushbu gilos navidan oʻz Vatanida boʻlgani kabi yaxshi hosil olish mumkinligini isbotladi.

Bahor faslida chilgi hosil sifatida pishadigan mazkur gilos navi eksport uchun moʻljallangan boʻlib, juda ham serhosilligi va agrotexnik ishlov berish jarayoni osonligi bilan ajralib turadi. Yevropa sifati andozalariga muvofiqligi hamda kimyoviy vositalar kam ishlatilishi bois u jahon bozorida ekologik toza mahsulot sifatida juda ham xaridorgir.

Yaqin kunlarda ilk hosil Markaziy Osiyo davlatlari va Rossiyaga eksport qilinishi rejalashtirilmoqda.

Shuningdek, gilos daraxti pastak boʻlgani sababli butash, agrotexnik ishlov berish va hosilni yigʻib olish jarayoni unchalik qiyinchilik tugʻdirmaydi. Eʼtiborlisi, oila aʼzolari issiqxonada muqobil isitish tarmogʻi oʻrnatish orqali keyingi yildan hosilni yanada ertaroq pishirish va daromad salmogʻini oshirishni maqsad qilgan. Hozirda ilgʻor agrotexnologiyalarni qoʻllagan holda mahsulot sifatini yaxshilash va tannarxni kamaytirish choralari koʻrilyapti. Shu maqsadda Umarjon Zokirov viloyatdagi oliy taʼlim muassasalari, ilmiy-amaliy markazlar hamda xorijlik olimlar bilan faol hamkorlikni yoʻlga qoʻygan.

Aytish joiz, bugungi kunda mahalladagi 1665 ta oilada 5205 nafar aholi istiqomat qiladi. Birgina oʻtgan yilning oʻzida 40 ta mikroloyiha amalga oshirilib, loyiha tashabbuskorlariga mahalladagi hokim yordamchisi tavsiyasi asosida banklar tomonidan 2,5 milliard soʻm imtiyozli kredit ajratib berildi.

Ayni paytda Eshonguzar ishsizlikdan xoli hudud maqomiga ega. Bu yil yakuni bilan esa mahallani kambagʻallikdan xoli hududga aylantirish koʻzda tutilgan.

Botir Madiyorov, “Xalq soʻzi”.