Mamlakatimizda yoshlar siyosatiga qaratilgan yuksak eʼtibor va izchil gʻamxoʻrlik natijasida yosh avlod uchun keng imkoniyatlar yaratilmoqda. Bugungi kunda yoshlar turli sohalarda oʻz salohiyatini namoyon etib, jamiyat hayotida faol ishtirok etmoqda. Shubhasiz, bilimli va maʼnan yetuk yoshlar yurtimiz kelajagining ishonchli bunyodkorlaridir.

Shu maqsadda Senatning Byudjet va iqtisodiy masalalar qoʻmitasi raisi Erkin Gadoyev hamda qoʻmita raisi oʻrinbosari Qobuljon Tursunov Toshkent davlat iqtisodiyot universiteti talabalari bilan uchrashuv oʻtkazdi.

Ochiq muloqot shaklida tashkil etilgan tadbirda yoshlarning kelajak rejalari, kasb tanlash masalalari hamda ularni qoʻllab-quvvatlashga qaratilgan imkoniyatlar yuzasidan fikr almashildi.

Senatorlar yurt taraqqiyoti uchun bilimli, tashabbuskor va faol kadrlar muhim ahamiyatga ega ekanini taʼkidlab, yoshlarni katta hayotga ishonch va qatʼiyat bilan qadam tashlashga chorladilar.

Shu bilan birga, yoshlarning har bir taklif va fikrlarini eshitishga tayyor ekanliklarini, ular uchun eshiklari doimo ochiqligini hamda oʻqish va izlanishdan hech qachon toʻxtamaslik zarurligini alohida taʼkidladilar.

Uchrashuv davomida talabalar tomonidan bildirilgan taklif va savollar diqqat bilan tinglanib, ularni hal etish yuzasidan tegishli mutasaddilarga vazifalar yuklatildi.

Qayd etilganidek, bunday uchrashuvlar yoshlarda kelajakka boʻlgan ishonchni mustahkamlash, ularning bilim olish va kasb egallashga boʻlgan intilishini yanada kuchaytirishga xizmat qiladi.