Joriy yilning 27-aprel kuni Prezidentning “Ruhiy holati buzilgan nogironligi boʻlgan shaxslarga ijtimoiy xizmat koʻrsatish tizimini tubdan takomillashtirish boʻyicha qoʻshimcha chora-tadbirlar toʻgʻrisida”gi PF–69-son Farmoni qabul qilindi.

Farmonga koʻra, bolalarning jismoniy-aqliy rivojlanishida kuzatiladigan nuqsonlarni erta aniqlash va oʻz vaqtida kompleks ijtimoiy xizmatlar bilan qamrab olish maqsadida 2026-yil 1-iyungacha bosqichma-bosqich “Erta aralashuv” xizmati yoʻlga qoʻyiladi.

“Erta aralashuv” xizmati doirasida:

• nogironlik belgilangan yoki jismoniy-aqliy rivojlanishida nuqsonlari mavjud 3 yoshgacha boʻlgan bolalarga Ijtimoiy himoya milliy agentligi ( Agentlik) tomonidan “Yagona milliy ijtimoiy himoya” axborot tizimida yuritiladigan maxsus elektron reyestrga kiritilgan nodavlat tashkilotlar tomonidan xizmat koʻrsatiladi;

• bolalarga maxsus pedagoglar tomonidan korreksion (rivojlantiruvchi) pedagogik yordam koʻrsatiladi hamda davolovchi jismoniy tarbiya yoʻriqchilari tomonidan kompleks rivojlantiruvchi reabilitatsion mashgʻulotlar oʻtkaziladi.

Nogironlik belgilari aniq koʻrinib turgan, anatomik nuqsonlar bilan tugʻilgan bolalarni qoʻshimcha tibbiy tekshiruv va jarrohlik amaliyotini oʻtkazish bilan bogʻliq xarajatlar Davlat tibbiy sugʻurtasi jamgʻarmasi hisobidan qoplanadi.