Kecha, 19-aprel kuni futbol boʻyicha Angliya Premyer ligasining 33-turidan oʻrin olgan bahslar davom ettirildi. Kun doirasidan oʻrin olgan bahsda muxlislar “titanlar jangi”ga guvoh boʻlishdi. Yaʼni turnir jadvalida peshqadam boʻlib turgan “Arsenal” klubi safarda “Manchester Siti” klubi mehmoni boʻldi.

Ushbu bahs oldidan “Arsenal” jamoasining ochkolari soni 70 tani tashkil etayotgan va musobaqa yakunlanishiga 5 ta tur qolgan bir vaqtda asosiy taʼqibchisidan 6 ochkoga oldinda edi. Shu sabab ushbu oʻyindagi gʻalaba London klubiga chempionlik uchun yashirin yoʻlak ochib berishi aniq edi.

“Manchester Siti” esa raqibidan koʻra 1 ta kam oʻyin oʻtkazgan va “Arsenal”ni magʻlub etgach, oʻsha qoldirilgan oʻyinida ham gʻalaba qozonib, turnir jadvalida 1-oʻringa qaytishi mumkin edi. Pep Gvardiola boshqaruvidagi jamoa mazkur bahs buning uchun katta qadam tashladi.

Uchrashuv “shaharliklar”ning 2:1 hisobidagi gʻalabasi bilan yakunlandi. Bahsda hisob 16-daqiqada Rayan Sherki tomonidan ochildi. Oradan 2 daqiqa oʻtib Kay Xavers muvozanatni tikladi. Birinchi boʻlim 1:1 hisobida yakunlandi.

Ikkinchi boʻlimning 65-daqiqasida Erling Xoland “Manchester Siti”ga gʻalaba keltirgan golni kiritdi. Shu tariqa “shaharliklar” musobaqa yakunida chempionlikni ilib ketish imkoniyatini anchaga oshirib oldilar.

Oʻzbekiston milliy terma jamoasi aʼzosi Abduqodir Husanov oʻyinni asosiy tarkibda boshladi va 90 daqiqa maydonda harakat qildi. Uning harakatlari “Sofascore” portali tomonidan 6,9 ballga baholandi.

Kun doirasidan oʻrin olgan yana bir bahsda muxlislar “Liverpul derbisi”ga guvoh boʻlishdi. Unda shahar nomi bilan ataluvchi jamoa “Everton” klubi mehmoni boʻldi.

Tarixda maʼlumki, “Everton” jamoasi APLning butun mavsumini yomon oʻtkazsa ham, aynan derbida “Liverpul”ni magʻlub etish orqali oʻz muxlislarini xursand qilib keladi. Bu gal ham jamoa Arne Slot boshqaruvidagi klubga jiddiy boshogʻriq boʻldi. Ammo bu bahsda gʻalaba qozonish mehmonlarga nasib etdi.

Uchrashuvda hisob 29-daqiqada Muhammad Saloh tomonidan ochildi. Birinchi boʻlim 1:0 hisobida yakunlandi.

Ikkinchi boʻlimning 54-daqiqasida Beto hisobni tenglashtirdi. Ikkinchi boʻlimga hakam tomonidan qoʻshib berilgan oʻninchi daqiqada esa Virjil Van Deyk “Liverpul”ga gʻalaba keltirgan golga mualliflik qildi. Shu tariqa oʻyin 2:1 hisobida yakunlandi.

Uchinchi oʻrin uchun jiddiy kurash olib borayotgan “Aston Villa” klubi bu turda “Sanderlend” bilan kuch sinashdi. Gollarga boy oʻtgan bahs mezbonlarning gʻalabasi bilan yakunlandi.

Uchrashuvda hisob 2-daqiqada Olli Uotkins tomonidan ochildi. Oradan 7 daqiqa oʻtib Kris Rigg muvozanatni tikladi. Birinchi boʻlimning soʻnggi 10 daqiqasida dastlab Olli Uotkins, keyin Morgan Rodjers gol kiritib tanaffusga jamoalar 3:1 hisobida yoʻl olishini taʼminlashdi.

Ikkinchi boʻlim 40 daqiqasi oʻrtacha tempda oʻtdi. Oxirgi 5 daqiqada esa “Sanderlend” futbolchilari Vilson Isidor va Tray Xyum gol kiritib hisobni yana tenglashtirdilar. Ammo bu ham hali hammasi emasdi.

Hakam tomonidan ikkinchi boʻlimga qoʻshib berilgan uchinchi daqiqada Temmi Abraxam “Aston Villa”ga gʻalaba keltirgan golni kiritdi. Shu tariqa oʻyin 4:3 hisobi bilan yakunlandi.