Shofirkon tumanidagi “Talisangobod” mahalla fuqarolar yigʻini hududida yashovchi Nuriddin Narziyev chiqindidan elektr energiyasi va biogaz ishlab chiqaruvchi uskuna ixtiro qildi. Generator deb atalayotgan bu qurilmani yaratish uchun u oʻz hamyonidan 20 million soʻm mablagʻ sarfladi.

– Bolaligimdan oʻrtoqlarim bilan noanʼanaviy jihozlar yasashga qiziqardim, – deydi u. – Ulgʻaygach, hayot tashvishlari bilan boʻlib ketdim. Lekin oʻsha qiziqish soʻnmadi. Chekka qishloqlardagi hayotni hamma yaxshi biladi. Aksariyatida tabiiy gaz yoʻq, elektr energiyasi taʼminotida uzilishlar kuzatiladi. Ish topish ham muammo. Anchadan buyon qishloqdoshlarimning shu kabi tashvishlarini qanday yengillatish mumkin, degan savol oʻylantirardi. Shunda foydalanilmayotgan maishiy chiqindini qayta ishlab undan muqobil energiya olish fikri tugʻildi.

Nuriddinning izlanishlari mahalla masʼullarini ham befarq qoldirmadi. Mahalla raisi Umidjon Toʻxtayevning aytishicha, Nuriddin olis sovuq oʻlkalarga ishlagani ketgan chogʻida ham shu gʻoyani obdan pishitishni, texnik yechimlar ustida bosh qotirishni unutmagan.

– Chamasi oʻn yil musofirchilikda boʻldim, – deya davom etadi N. Narziyev. – Sizga aytsam, oʻz yurtingga yetari yoʻq. Musofirchilikda chetni toshi tugul kesagi ham ozor beradi. Koʻp qiyinchiliklarni boshdan kechirdim. Endi u kunlar ortda qoldi. Chunki bu generator birgina meni emas, oʻnlab oilalar turmush tashvishlarini yengil qila oladi.

Qurilma nafaqat chorva mollari, balki beton boʻlaklari va qumdan boʻlak barcha turdagi maishiy chiqindilarni qayta ishlab, bir paytning oʻzida ham elektr energiyasi, ham biogaz olish imkonini beradi. Tajriba koʻrsatdiki, bir sutkada 1200 kilovatt elektr energiyasi, 300 kub metr biogaz ishlab chiqarsa boʻladi. Har bir oilaga moʻljallab tayyorlanadigan moslama vositasida qishda uyni isitish, issiqxonani kerakli harorat bilan taʼminlash, roʻzgʻor tashvishlarini yengillatish mumkin. Tok tekinga tushadi. Ehtiyojdan ortiqcha elektr energiyasini sotish orqali qoʻshimcha daromad olsa ham boʻladi. Yana bir muhim jihati, u qishloqdagi bandlik muammosiga barham beradi. Ixtirochining taʼkidlashicha, bu moslama bir oiladagi uch – toʻrt kishini ish bilan taʼminlab, xonadonning turmush sharoitini, shuningdek, ekologiyani yaxshilashga xizmat qiladi.

Binobarin, innovatsion ishlanma qishloqdagi hayotni, xususan, tabiiy gaz yetib bormagan hududlardagi turmush tarzini oʻzgartirib yuborsa, ne ajab!

Istam IBROHIMOV, «Xalq soʻzi».