Turkiyada oʻqotar qurolga egalik qilishni cheklovchi choralar koʻriladi va qurol egalari uchun jazo choralari kuchaytiriladi. Bu haqda mamlakat prezidenti Rejep Tayyip Erdogʻan maʼlum qildi, uning soʻzlaridan TASS iqtibos keltirmoqda.

Tegishli chora-tadbirlar oʻtgan haftada mahalliy maktablarda yuz bergan ikkita otishmadan soʻng eʼlon qilindi.

“Maktablarimizda xavfsizlikni taʼminlash bizning asosiy ustuvor vazifamizdir. Bu masalada na hozir, na kelajakda hech qanday yon berish boʻlmaydi. Oʻqotar qurolning xavfsizligi va saqlanishini taʼminlash boʻyicha oʻz majburiyatlarini bajarmayotgan qurol egalari uchun jazoni kuchaytiramiz. Qurolga egalik qilishni cheklovchi qoʻshimcha huquqiy normalarni joriy etamiz”, — deya taʼkidladi Turkiya yetakchisi.

Erdogʻanning soʻzlariga koʻra, Qahramonmarash viloyatidagi maktabda yuz bergan hodisa oqibatida toʻqqiz kishi halok boʻlgan, 21 kishi jarohatlangan. Shu mintaqadagi Shanliurfa viloyatidagi maktabda esa 19 kishi yaralangan.

“Biz ijtimoiy tarmoqlarda va raqamli aloqa platformalarida yolgʻon, manipulyativ va zararli kontent tarqatuvchi akkauntlarga nisbatan zarur choralarni koʻrdik”, — deya qoʻshimcha qildi u.

Turkiya prezidentining taʼkidlashicha, mamlakat hukumati virtual patrullikni kuchaytirish va huquqni muhofaza qilish organlarining kiberxavfsizlik sohasidagi salohiyatini oshirish niyatida.