Oʻzbekiston davlat konservatoriyasi Nukus filiali tashkil topganiga 5 yil toʻldi. Shu munosabat bilan kuni kecha Nukus shahrida joylashgan Berdaq nomidagi Qoraqalpoq davlat akademik musiqali teatrida hisobot konserti yuqori saviyada tashkil etildi.

Qoʻshiqlar Qoraqalpogʻistonda xizmat koʻrsatgan artist, “Shuhrat” medali sohibi, Oʻzbekiston davlat konservatoriyasi Nukus filiali direktori, professor Rudakiy Allanbayev va filialning iqtidorli talaba-yoshlaridan tashkil topgan Xalq cholgʻulari orkestri, Simfonik orkestr va Xalq cholgʻulari ansambli bilan birgalikda jonli ovozda ijro etildi.

Shuningdek, konsertda Oʻzbekiston xalq artisti Aygul Nadirova va Rudakiy Allanbayevning iqtidorli shogirdlari tomonidan turli janrlardagi asarlar yuksak mahorat bilan ijro etildi.

Konsert davomida yurtimizning taniqli ustoz sanʼatkorlari tomonidan filial faoliyati va erishilgan yutuqlari boʻyicha iliq hamda samimiy fikrlarini bildirdi.

Maʼlumot oʻrnida, Oʻzbekiston Respublikasi Vazirlar Mahkamasining 2021-yil 5-aprel kungi 186-sonli qarori asosida Qoraqalpogʻistonda Oʻzbekiston davlat konservatoriyasining Nukus filiali tashkil etilgan boʻlib, Respublika sanʼatining rivojlanishiga katta hissa qoʻshib kelmoqda.

Filial tashkillashtirilgan kundan bugungi kunga qadar filialda maʼnaviy- maʼrifiy va ilmiy sohalarda bir qancha yutuqlarga erishib kelmoqda.

Oʻzbekiston davlat konservatoriyasi Nukus filiali bir nechta xorijiy davlatlarning oliy taʼlim muassasalari bilan hamkorlik shartnomalarini imzolashga erishdi. Xususan, hozirda Qozogʻiston Respublikasida joylashgan Qurmangʻozi nomidagi Qozoq milliy konservatoriyasi, T.Sattarov nomidagi Tojikiston milliy konservatoriyasi va Mirzo Tursunzoda nomidagi Tojikiston davlat sanʼat va madaniyat instituti, Italiya davlatining LʻAquila shahridagi “ALFREDO CASELLA” konservatoriyasi, Xitoy xalq Respublikasidagi Uxan musiqiy konservatoriyasi bilan hamkorlik aloqalarini olib bormoqda.

Shuningdek filialda tahsil olayotgan iqtidorli talabalar respublika va xalqaro tanlovlarda faol ishtirok etib, sovrinli oʻrinlarni egallab kelishmoqda.

Shu kunga qadar filial professor-oʻqituvchilari tomonidan 9 ta darslik, 30 ta oʻquv-uslubiy qoʻllanma, 15 ta monografiya nashr qilindi.

Filial tashkillashtirilgan yili 47 nafar talaba oʻqishga qabul qilingan boʻlsa, hozirda talabalar soni 247 nafarni tashkil etmoqda. 2025-yilda ilk bitiruvchilar oʻqishni muvaffaqiyatli yakunlab, shulardan 10 nafari magistraturaga qabul qilindi.

Oʻzbekiston davlat konservatoriyasi Nukus filiali 2025/2026 oʻquv yilini yangi binoda faoliyatini boshladi. 2025-yilning 30-sentyabr kuni filial yangi binosining ochilish marosimi tantanali ravishda boʻlib oʻtdi. Filialning yangi binosi 300 oʻringa moʻljallangan boʻlib, talabalarning bilim olishlari uchun barcha sharoitlar yaratilgan.