Avvalroq, ijtimoiy tarmoqlarda Surxondaryo viloyati Boysun tumani hududidagi suv havzasida neftga oʻxshash qatlam paydo boʻlgani toʻgʻrisida videotasvirlar keng tarqalgan edi.

Mazkur holat yuzasidan viloyat Ekologiya va iqlim oʻzgarishi bosh boshqarmasi maʼlumot berib, mazkur holat Boysun tumani hududidagi Kofurun soyidan kelgan sel oqimlari bilan bogʻliq boʻlib, ushbu oqim Bandixon tumani orqali oqib oʻtib, Qumqoʻrgʻon tumanigacha yetib kelganini maʼlum qilgandi.

Bildirilishicha, ushbu holat Ekologiya va iqlim oʻzgarishi milliy qoʻmitasi Davlat ekologik nazorat inspeksiyasi tomonidan oʻrganilgan.

Aniqlanishicha, Boysun tumanida “Surxan Gas Chemical Operating Company” MCHJ qoʻshma korxonasiga qarashli quduqdan neft mahsulotlari boʻlgan suyuqlik qaynab chiqish holati kuzatilgan. Bu suyuqlik tabiiy suv havzasiga tushishining oldini olish maqsadida qoʻshma korxona tomonidan “Eriell Oilfield Services Middle East DMCC” korxonasining maxsus texnikalari yordamida 11 ta handaq qazilib, joylashtirilgan.

Oʻrganish davomida 23-aprel kuni Boysun tumanidagi kuchli yogʻingarchiliklar natijasida 1,2 tonna neft mahsuloti boʻlgan suyuqlik “Xongaronsoy”ga oqib ketganligi maʼlum boʻlgan. Natijada Oʻzbekiston Respublikasi Vazirlar Mahkamasining 2021-yil 12-apreldagi 202-son qaroriga asosan kompensatsiya toʻlovlari hisob-kitob qilinganda 8,5 milliard soʻmdan ortiqni tashkil qilgan.

Hozirda noxush holat bartaraf etilib, suv neft aralash suyuqlikdan tozalangan. Taʼkidlanishicha, oʻrganish ishlari davom ettirilib, jarayon yakunlanganidan soʻng toʻplangan hujjatlar holatga huquqiy baho berish uchun huquqni muhofaza qilish organlariga taqdim qilinadi.