Mashgʻulotlarda viloyatda faoliyat yuritayotgan jurnalist va blogerlar, bosma va internet jurnalistikasi, televideniye va radio vakillari, axborot xizmatlari xodimlari ishtirok etmoqda.

Mashgʻulotlarda taniqli media ekspertlar, kontent markazi xodimlari va jurnalistlar tomonidan Oʻzbekiston bosma mediasidagi kontent: amaliyot, muammo va yechim, Prezident faoliyatini ommaviy axborot vositalarida yoritishning asosiy yoʻnalishlari, mahalliy va xalqaro ommaviy axborot vositalarining ijtimoiy tarmoqlardagi amaliyotidan keyslar tahlili kabi mavzular boʻyicha fikr almashilmoqda.

— Media haftalik shunchaki oʻquv seminar emas, ommaviy axborot vositalari vakillari, jurnalist va blogerlar, kontent tayyorlash bilan shugʻullanuvchilar uchun oʻzaro tajriba, fikr almashish maydoni vazifasini oʻtamoqda, — deydi media ekspert Eldor Asanov. — Bu maydonda koʻproq amaliy mashgʻulotlar va keyslarga alohida eʼtibor qaratyapmiz, bir-birimizdan oʻrganyapmiz, tajribalarimizni boʻlishyapmiz. Bugungi kunda ommaviy axborot vositalarida, ijtimoiy tarmoqlarda xabarlar, maʼlumotlar va tahliliy materiallarni eʼlon qilishning huquqiy, axloqiy masalalari yuzasidan hamkasblarimizga tushuncha berishga harakat qilyapmiz.

Haftalik davomida ishtirokchilar media savodxonlik, axborotni tahlil qilish, feyk xabarlarni aniqlash hamda auditoriyaga mos va sifatli kontent yaratish boʻyicha bilim va koʻnikmalarini mustahkamlash imkoniga ega boʻladilar.

Mazkur tadbir hududlarda media madaniyatni rivojlantirish, ochiq va shaffof axborot muhitini shakllantirish hamda yoshlarni media sohasiga keng jalb etishga xizmat qiladi.

Abdulaziz YOʻLDOSHEV, “Xalq soʻzi”.