Korrupsiyaga qarshi kurashish agentligi tomonidan Navoiy viloyati Konimex tumanini “korrupsiyadan xoli hudud”ga aylantirish boʻyicha Dastur ijrosi oʻrganildi.

Oʻrganishlar natijasiga koʻra, bugungi kunga qadar Dastur doirasida tumandagi davlat organlari va tashkilotlarining 81 nafar boshqaruv xodimi korrupsiyaga qarshi kurashish yoʻnalishida oʻqitilganligi hamda hududdagi umumtaʼlim maktablari hamda maktabgacha taʼlim tashkilotlarida 5 yildan ortiq faoliyat yuritgan rahbarlar rotatsiya qilinganligi aniqlangan. Shuningdek, tuman tibbiyot birlashmasida vakant lavozimlarni maxsus platforma (vacancy.argos.uz) orqali eʼlon qilish va ochiq tanlov asosida ishga qabul qilish tizimi joriy etilganligi qayd qilindi.

Ishchi guruh oʻrganishlar davomida tumandagi davlat maktabgacha taʼlim tashkilotlarida autosorserlar tomonidan yetkazib berilayotgan oziq-ovqat mahsulotlarining belgilangan talablarga muvofiqligi ustidan nazorat oʻrnatish, shuningdek, korrupsiyaga nisbatan murosasizlikni shakllantirish borasida olib masalalariga alohida eʼtibor qaratdi. Tumandagi dehqon bozorida raqamlashtirish ishlarining holati hamda sogʻliqni saqlash muassasalarida korrupsiyaning oldini olishga qaratilgan amaliy choralar bilan tanishildi.

Dastur ijrosi Xalq deputatlari viloyat Kengashi hamda masʼul rahbarlar ishtirokida muhokama qilinib, Dasturda belgilangan tadbirlar samaradorligi va taʼsirchanligini oshirish, vazifa va maqsadlarni oʻz vaqtida amalga oshirish yuzasidan tegishli tavsiyalar berildi. Tadbirlar doirasida Xalq deputatlari viloyat Kengashining sessiyalarini 2025-yil davomida jonli efirda namunali tarzda tashkil etgani eʼtirof etilib, Kengashga Agentlik direktorining tashakkurnomasi topshirildi.

Temur ESHBOYEV, “Xalq soʻzi”.