7-mart kuni oliy taʼlim, fan va innovatsiyalar vaziri Qoʻngʻirotboy Sharipov Sirdaryo viloyati Oqoltin tumanida joylashgan 3-son texnikumda boʻlib, muassasada amalga oshirilayotgan qurilish va taʼmirlash ishlari, shuningdek taʼlim jarayoni uchun yaratilgan shart-sharoitlar bilan tanishdi.

Tashrif davomida texnikum rahbariyati tomonidan muassasaning faoliyati, erishilgan natijalar hamda mavjud muammolar yuzasidan taqdimot oʻtkazildi. Unda texnikumda 417 nafar oʻquvchi taʼlim olayotgani, ularga 25 nafar pedagog hamda 10 nafar ishlab chiqarish taʼlimi ustasi dars berayotgani maʼlum qilindi.

2025-yil yakunlariga koʻra texnikumda taʼlim sifati koʻrsatkichlari boʻyicha muayyan natijalarga erishilgan. Xususan, oʻquvchilarning bandlik darajasi 82,6 foizni tashkil etgan boʻlib, mazkur koʻrsatkich boʻyicha muassasa viloyatda 5-oʻrinni egallagan.

Vazir texnikumdagi amaliyot ustaxonalari faoliyati bilan ham tanishdi. Jumladan, oʻquvchilarning tikuvchilik va pazandachilik yoʻnalishlarida amaliy koʻnikmalarni egallashi uchun tashkil etilgan oʻquv-ishlab chiqarish xonalaridagi mashgʻulotlar koʻzdan kechirildi. Ushbu ustaxonalarda oʻquvchilar kasbiy koʻnikmalarini mustahkamlab, kelgusida mehnat bozorida talab yuqori boʻlgan mutaxassisliklarni egallamoqda.

Shuningdek, 2026-yilda texnikumda taʼlim sifati koʻrsatkichlarini oshirish, dual taʼlim ulushini kengaytirish, yangi kasb yoʻnalishlarini joriy etish hamda moddiy-texnik bazani mustahkamlash boʻyicha rejalar belgilab olingani taʼkidlandi.

Shuningdek, Q.Sharipov texnikumda amalga oshirilayotgan qurilish ishlarini koʻzdan kechirib, taʼlim sifatini oshirish, dual taʼlimni kengaytirish, oʻquvchilarning amaliyot va ishga joylashish imkoniyatlarini yanada koʻpaytirish boʻyicha mutasaddilarga tegishli topshiriqlar berdi.