Andijon viloyatining Jalaquduq tumanida kadastr boʻlimi boshligʻi fuqarodan muqaddam 3 ming dollar pora olgani uchun qoʻlga olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Maʼlum qilinishicha, Kadastr agentliging Jalaquduq tumani boʻlimi boshligʻi uy-joy qurish va dehqon xoʻjaligida foydalanish uchun fuqaro M.M.ga jami 25 sotix yer maydoni ajratib berishi evaziga 2024-yilda 3 ming dollarni firibgarlik yoʻli bilan qoʻlga kiritib, oʻziga nisbatan shubha uygʻotmaslik maqsadida fuqaroga goʻyoki “Sharxoncheki” MFY hududidan uy-joy qurish uchun 8 sotix yer maydoni ajratilganligi toʻgʻrisida qaror chiqarilganini aytgan.

Tadbir davomida, Jalaquduq tumani kadastr boʻlimi xodimi A.O. boʻlim boshligʻining topshirigʻiga asosan fuqaroga 3 ming dollarini qaytarib bergan vaqtida ashyoviy dalillar bilan ushlangan.

Qayd etilishicha, hozirda mazkur holatlar yuzasidan Jinoyat kodeksining 168-moddasi (firibgarlik) bilan jinoyat ishi qoʻzgʻatilib, tergov harakatlari oʻtkazilmoqda.