Mazkur tadbir yurtimizda xotin-qizlarning jamiyat va davlat hayotidagi oʻrni tobora ortib borayotganini, ularning huquq va manfaatlarini taʼminlash, munosib mehnatini eʼtirof etish, oiladagi va mahalladagi ibratli faoliyatini ragʻbatlantirishga qaratilgan keng koʻlamli islohotlarning mantiqiy davomi sifatida tashkil etildi.

Marosimda joriy yilda “Moʻtabar ayol” koʻkrak nishoniga munosib koʻrilgan 351 nafar xotin-qizlardan 51 nafariga koʻkrak nishonlari topshirildi. Tadbirda taʼlim, sogʻliqni saqlash, ilm-fan, madaniyat va sanʼat, qishloq xoʻjaligi, tadbirkorlik, mahalla tizimi hamda ijtimoiy sohalarda samarali faoliyat olib borib, el ishonchini qozongan, oilasida ham, jamoatchilik hayotida ham ibrat koʻrsatib kelayotgan fidoyi ayollar jam boʻldi.

Tantanali marosimni Bosh vazir oʻrinbosari — Oila va xotin-qizlar qoʻmitasi raisi Zulayho Mahkamova ochib berdi. U oʻz nutqida yurtimiz boʻylab, markaziy shaharlardan tortib chekka qishloq va ovullargacha — mehnat qilayotgan, oila va jamiyat barqarorligini taʼminlashga munosib hissa qoʻshayotgan xotin-qizlar shaʼniga iliq tilaklar bildirdi.

“Moʻtabar ayol” koʻkrak nishoni mohiyatida Prezidentimizning “Maʼrifatli jamiyatni maʼrifatli onalarsiz qurib boʻlmaydi!” degan gʻoyasi mujassam. Bugun mukofotlanayotgan opa-singillarimiz tom maʼnoda mahalla va jamiyatning vijdoni, oilalarning totuvligi hamda maʼnaviy muhit barqarorligiga munosib hissa qoʻshib kelayotgan fidoyi ayollardir», — dedi Bosh vazir oʻrinbosari.

Shuningdek, Zulayho Mahkamova “Moʻtabar ayol” koʻkrak nishoni bilan taqdirlanayotgan opa-singillarimiz yurtimizda maʼnaviy muhitni sogʻlomlashtirish, milliy qadriyatlarni targʻib etish, tinchlik va totuvlikni mustahkamlash, yoshlarni vatanparvarlik ruhida tarbiyalash yoʻlida jonbozlik koʻrsatayotgan ibratli ayollar ekanini alohida qayd etdi.

Tadbirda soʻnggi yillarda xotin-qizlarni qoʻllab-quvvatlash, ularning bandligini taʼminlash, kasbga yoʻnaltirish, tadbirkorligini rivojlantirish, taʼlim olish imkoniyatlarini kengaytirish hamda rahbarlik lavozimlarida faol ishtirokini qoʻllab-quvvatlash borasida amalga oshirilgan ishlarga eʼtibor qaratildi.

Taʼkidlanganidek, Jahon banki yangilangan metodologiyasiga asoslangan “Ayol, biznes va qonun” indeksining 2026-yilgi hisobot natijalariga koʻra, Oʻzbekiston oʻz pozitsiyasini 43 pogʻonaga yaxshilab, 100 dan 82,1 ball bilan 190 ta davlat orasida 48-oʻrinni egalladi.

Xususan, 2025-yilda 2,6 million nafar xotin-qizning daromadli mehnat bilan band boʻlishiga koʻmaklashilgani, 331 ming nafar xotin-qiz kasb-hunar va tadbirkorlikka oʻqitilgani qayd etildi. Bugungi kunda xotin-qizlarning turli sohalardagi ulushi ham oshib borayotgani, jumladan, oliy taʼlimda va ijtimoiy hayotda faol ishtiroki kengayayotgani taʼkidlandi.

Shuningdek, tashkilotlarda xotin-qizlar va erkaklar uchun teng huquq va imkoniyatlar kafolatlarini taʼminlash boʻyicha maslahat kengashlari soni 4000 taga yetkazilgani, “Ibratli oila” koʻkrak nishoni hamda taʼlim grantlari va kontrakt kvotalarini kengaytirish boʻyicha qabul qilingan qarorlar xotin-qizlarning imkoniyatlarini yanada oshirayotgani alohida qayd etildi.

Tadbir doirasida “Moʻtabar ayol” koʻkrak nishoni mohiyati va ramziy mazmuni haqida ham batafsil toʻxtalib oʻtildi. Ushbu nishon faollik va tashabbuskorlik, oʻz kasbiga sadoqat, oilada ibrat, farzand tarbiyasida masʼuliyat, mahalla va jamoatchilik orasida hurmat-eʼtibor qozongan, ijtimoiy hayotda jonbozlik koʻrsatayotgan ayollarga berilishi bilan alohida ahamiyat kasb etadi.

Maʼlumot oʻrnida: 2019-yildan buyon “Moʻtabar ayol” koʻkrak nishoni bilan mukofotlash amaliyoti izchil davom etib, oʻtgan 7-yil mobaynida nishon sohibalari soni 2110 nafarga yetgan.

Shuningdek, tadbir davomida soʻzga chiqqan jamoat arboblari va ziyolilar xotin-qizlarning jamiyatdagi oʻrni, ona siymosiga hurmat, oilaviy qadriyatlarni asrash va mustahkamlash masalalari yuzasidan fikr-mulohazalar bildirdilar.

Maʼlumot uchun, keyingi yillarda 3 nafar xotin-qizlarimizga akademik ilmiy unvoni berildi. Shuningdek, ayollarimizdan 17 nafari Vatanimizning eng oliy mukofoti – “Oʻzbekiston Qahramoni” unvoniga sazovor boʻlgan. 400 nafardan ortiq qizlarimiz Zulfiya nomidagi davlat mukofotiga, 200 ga yaqin qizlarimiz “Nihol” mukofotiga munosib koʻrilgan.

Ayollarimizning davlat boshqaruvidagi ulushi 35 foizga, tadbirkorlik sohasida 37 foizga, siyosiy partiyalar tarkibida esa 49 foizga yetdi.

Xususan, ayollarning ulushi tibbiyot tizimida 77 foizdan koʻproqni, taʼlim sohasida salkam 74 foiz, savdoda 49 foiz, iqtisodiyot tarmoqlari, sanoat va ishlab chiqarishda qariyb 46 foiz, madaniyat va sportda 45 foiz, qishloq xoʻjaligida 42 foizdan ziyodni, moliya va sugʻurta faoliyatida 37 foizdan ortiqni, axborot va aloqa xizmatida 35 foiz, professional, ilmiy va texnik faoliyatda qariyb 34 foizni, davlat boshqaruvi va mudofaa tizimida 27 foizdan koʻproqni tashkil etmoqda.

Bu koʻrsatkichlar ayollarning ulkan aqliy-intellektual salohiyatidan, betakror isteʼdodidan dalolat beradi.