Adliya vazirligi tomonidan Davlat buyurtmalari asosida yaratiladigan tasviriy va amaliy sanʼat asarlari mualliflarining ish haqi hamda ular tomonidan sarflanadigan xomashyolar xarajatlarini belgilash tartibi toʻgʻrisidagi idoraviy hujjat davlat roʻyxatidan oʻtkazildi.

Mazkur hujjat davlat buyurtmasi asosida yaratiladigan tasviriy va amaliy sanʼat asarlari mualliflarining ish haqi hamda sarflanadigan xomashyolar xarajatlarini belgilash tartibini nazarda tutadi.

Oʻzbekiston Badiiy akademiyasi huzuridagi Badiiy ekspertlar kengashi badiiy asarning bahosini uning badiiy qiymatidan kelib chiqib, mehnatga haq toʻlashning eng kam miqdoriga nisbatan mazkur Nizomning ilovalarida belgilangan eng quyi va eng yuqori koʻrsatkichlar oraligʻida hisoblaydi.

Bunda, Badiiy ekspertlar kengashi boshqa mualliflik asarlari yoki tayyor namunadan nusxa olinib yaratilgan asarlarni baholash uchun qabul qilmaydi.

Badiiy ekspertlar kengashi tasviriy va amaliy sanʼat asarlarining badiiy qiymatini quyidagi xususiyatlarni inobatga olgan holda baholaydi:

badiiy asarning turi;
badiiy asarni ishlab chiqish jarayonining murakkabligi;
mehnat sarfi;
muallifning ijodi va boshqalar.