Bahor nafasi ufurib turgan shu kunlarda koʻhna Buxoro sayyohlar bilan tobora gavjumlashmoqda. Soʻlim Labihovuz, donishmandmonand Ark qoʻrgʻoni, Poyi Kalon majmuasi boʻylab oʻtgan yoʻlaklarda quloqqa ingliz, ispan, rus, fransuz, xitoy, yapon, koreyscha soʻzlar chalinadi. Osori atiqalarni tomosha qilib, hayratga tushgan, bir olam taassurotlar ogʻushida yurgan yuzlab sayyohlarni koʻrib koʻngildan bu tinchlik-osoyishtalik neʼmati, degan oʻy kechadi. Eʼtiborni mehmonlar bilan xorijiy tillarda emin-erkin soʻzlashayotgan viloyat xavfsiz turizmni taʼminlash boshqarmasi xodimlari tortadi.

— Boshqarmamiz respublika Vazirlar Mahkamasining “Buxoro, Samarqand, Xiva va Shahrisabz shaharlarida xavfsiz turizmni taʼminlash chora-tadbirlari toʻgʻrisida”gi qaroriga muvofiq tashkil etilgan, — deydi boshqarma masʼul xodimi, katta leytenant Zarnigor Tillayeva. — Kadrlar tanlashda xodimlarning xorijiy tillarni bilishidan tashqari kasbiy tayyorgarligi, maʼnaviy dunyosining nechogʻli boyligi kabi mezonlarga tayanilgan. “Xavfsiz turizm” dasturi asosida ishlayapmiz. Mehmonlarning emin-erkin sayohat qilishlari uchun zarur barcha qulayliklar mavjud. Ularning oʻzlarini oʻz uylaridagidek his etishlarini koʻrish biz uchun ham maroqli. Muhimi, sayyohlar yurtimizdan mamnun holda qaytishmoqda.

Darhaqiqat, turistlarning tinch va xotirjam sayr-u sayohat qilishlari, xalqimizning boy madaniy va maʼnaviy merosidan bahramand boʻlishlari uchun zamonaviy shart-sharoitlar muhayyo etilgan. Koʻhna shaharda oʻrnatilgan oʻnlab videokuzatuv, teplovizor moslamalari, aloqa tashvish tugmalari, avtomobil tezligini aniqlaydigan uskunalar hamda xushmuomala, chehrasi hamisha ochiq xodimlar xorijiy sayyohlarning xavfsizligini taʼminlashga xizmat qilmoqda.

Aytish joizki, birgina oʻtgan yilda viloyatga dunyoning turli davlatlaridan 2,7 million nafar turist keldi.

Istam IBROHIMOV, “Xalq soʻzi”.